Спорты рæзтæн

Æрыдоны фæвæййы стадионы бындурон цалцæг. Спортивон фæз цалдæр азы уыд заууат уавæры. 2014-æм азы дзы сарæзтой нырыккон домæнтæн дзуаппдæттæг æмбæрзæнимæ фæз. Æндæр дзы ницы фадæттæ уыд спортсментæн. Абон куыстыты хæрзхъæддзинад сбæрæг кодта республикæйы физкультурæ æмæ спорты министр Гæбулты Владимир. Бындурон цалцæджы куыстытæ дзы цæуынц федералон фæрæзты руаджы. Радих сын кодтой 17 милуан сомы. Уыдон райсыны фадат фæзынд, Цæгат Ирыстон Кавказы адæмты культурæ æмæ спорты фестивалы кæй рамбылдта, уый руаджы. Стадионы фæнд кæнынц дугъы уайынæн фæндаг, спортуарджытæн бынæттæ æмæ хинайæн уæттæ спортсментæн саразын. Рухсдæттæг системæ дæр баивдзысты. Аразджыты ныхæстæм гæсгæ, куыстытæ тагъд фæуыдзысты. Гæбулты Владимир, РЦИ-аланийы физкультурæ æмæ спорты министр: «Алы районы дæр ахæм объекттæ хъæуынц. Футболон стадионтæй уæлдай ма - спортивон залтæ æмæ комплекстæ. Хорз уаид, алы ран дæр ахæм бæстыхæйттæй цух куы нæ `ййафиккам, уæд. Республикæйы разамындимæ æмæ федералон центримæ фæнд кæнæм ацы хъуыддагыл бакусын. Спортмæ æмхиц чи у, уыдонæн æппæт хъæугæ фадæттæ аразын хъæуы». Ныртæккæ стадионы тренировкæтæ фæкæнынц сывæллæтты къордтæ, саразынц ма дзы республикон ерыстæ дæр. Гæбулты Владимир схорзæхджын кодта, футболуарзджытæй ацы спортмæ æмхиц чи у æмæ дыккаг бынат чи райста, уыдоны. Уымæй уæлдай ма министр æрныхас кодта Æрыдоны районы сæргълæууæгимæ фидæны пълæнтты тыххæй. Се 'хсæн - спортивон комплексы арæзтад. Æгас республикæйы ма æрмæстдæр Æрыдоны районы нæй хи сæрмагонд комплекс æмæ ленк кæныны бассейн. Спортмæ æмхиц фæсивæд арæхдæр фæцæуынц скъолаты залтæм æмæ æрдæг пырх стадионмæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv