Фæстиуджытæ аиуварс кодтой

Зæронд Бæтæхъойыхъæуы æрдзон фыдбылызы фæстиуджытæ аиуварс кодтой. Раздæр уын куыд хъусын кодтам, афтæмæй ацы цау æрцыди куыстуаты хъахъхъæнджыты аххосæй. Сæ цæстдæлдахæн митæ расайдтой фыдбылызмæ – быдыртыл нефть акалд. Цалынмæ бынæттон цæрджытæ фæдис кодтой «Ай цы хабар у», зæгъгæ, уæдмæ хъуыддагмæ лæмбынæг æркастысты барадхъахъхъæнджытæ æмæ æрдзон ведомствæты специалисттæ. Семæ нæ сфæлдыстадон къорд дæр. Сæрвæты æмæ быдырты мингай квадратон метры ма цалдæр къуырийы размæ сау адардтой. Хъæуы алыварс фæзуæттæ та уыдысты нефтæй чъизи мит æмæ кæрдæгимæ. Ныр хъæуы цæрджытæ уынынц æрмæст сыгъдæг змис. Цалдæр боны дæргъы, райсомæй изæрмæ, эксковатортæ, бульдозертæ æмæ камазтæ тоннæгай ластой змис æмæ йæ пырх кодтой нефть кæм уыд, уыцы фæзуæттыл. Сæ хъус сæм дардтой æрдзмæ цæстдарды управленийы специалисттæ. Ныр сау сызгæрины цадтæ кæм уыцыдысты, уыцы зæххыты уæлцъармæ базылдысты. Техногенон знаггады фæстиуджытæ иуварсгонд кæй æрцыдысты, уый тыххæй барадхъахъæнджытæ дæр сарæзтой акт. Уæвгæ, пайдайаг æрдзон гуырæн куыстуат «Меркурий»- мæ хауы. Ис Заманхъулы. Кусынц 10 азы бæрц. Фыдбылыз кæй æрцыд, уым сын аххосджынтыл сæхи банымадтой. Фæлæ, куыд рабæрæг, афтæмæй куыстуаты минæвæрттæ сæхæдæг дæр хъыгдардбаййафджытæ сты.  Хъахъхъæнджытæ сын сæ нефть давтой. Гуырæнтæй иу æй куы систой, уæд донæмхæццæ уыд. Сæхицæн зын нæ кæнгæйæ, æмхæццæ дон калдтой зæххмæ æмæ иу дон зæххы куы ацыд, уæд нефть æмбырд кодтой. «Меркурий»-йы директор Гуытиаты Владимир: «Ныртæккæ барадхъахъхъæнджытæ нымайынц закъонхалджытæ куыстуатæн цас зиан æрхастой, уый. Æрмæст мæнæ цæмæй фыдбылызы фæстиджытæ аиуварс кæнынæн бахъуыд 400 мин сомы. Уыцы æхцайы бæрц домдзыстæм давджытæн сæхицæй». Уголовон хъуыддаг арвыстой прокуратурæмæ. Уым рахæсдзысты кæронбæттæн уынаффæ. Тæрхонгæнджытæ ма рахæсдзысты куыстуаты хæрдзтæ чи бафиддзæн, уыцы уынаффæ. Аххосджынтæн бафидын кæндзысты 400 мин сомы.  Фæлæ цыфæнды тæрхон куы рахæссой, уæддæр сæйрагдæр у экологийы уавæр æмæ йæ сыгъдæгдзинад. Уæдмæ та уал специалисттæ зæгъынц – ныртæккæ Бæтæхъойыхъæуы цæрджыты æнæниздзинадæн, сæ фосæн æмæ зæххы уæлцъарæн тæссаг ницæмæй у! _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv