Цæгат Ирыстоны равдыстой документалон киноныв «Забытая победа»

Цæгат Ирыстоны сывæллæтты сфæлдыстады галуаны равдыстой нæ республикæйы адæмон артист, режиссер Рафаэль Гаспарянцы документалон киноныв «Забытая Победа»-зæгъæ. Ацы киноныв сбастой Фыдыбæстæйы Стыр хæсты цаутимæ. 77 азы рацыд, Цæгат Ирыстоны æфсад немыцы тугдзых къухтæй куы суæгъд ис, уæдæй. Уыцы историон хабæртты фæдыл, нæ республикæйы æрвылаз цæуынц алыхуызон мадзæлттæ. Афтæ абон дæр, сывæллæтты сфæлдыстады галуаны æрæмбырд сты бирæ адæм, цæмæй феной киноныв, æмæ бæлвырддæр базонгæ уой, ирон адæм Фыдыбæстæйы хæсты цы фæд ныууагътой, уыимæ. Кинонывы равдыст сарæзтой Уæрæсейы скъоладзауты змæлды регионалон ресурсон центр æмæ Цæгат Ирыстоны Ветеранты совет, æхсæнад «Боевое братство» æмæ фæсивæды æфсæддон-патриотон хъомылады центры хъæппæрисæй. Сæ фæрцы арæзт æрцыд лæгдзинады урокты цикл дæр. Кинонывы режиссер Рафаэль Гаспарянц куыд бафиппайдта, афтæмæй йе ’сфæлдыстадон къордимæ бæстонæй сæхи цæттæ кодтой ацы кинонывмæ. Сæйрагдæр уыд, цæмæй адæм, уæлдай дæр та скъоладзаутæ, хуымæтæг æмæ æнцонæмбарæн æвзагæй ацахсой æмæ бамбарой кинойы апп. Уыимæ Рафаэль Гаспарянц куыд радзырдта, афтæмæй Фыдыбæстæйы Стыр хæсты историйы тыххæй бирæ ногдзинæдтæ базондзысты. Гуыцмæзты Анжеликæ, регионалон ресурсон центр Уæрæсейы скъоладзауты змæлды кусæг: «Абон ацы кинонывы равдыстмæ æрбацыдысты нæ республикæйы 8-æм æмæ 11-æм кълæсты ахуырдзаутæ. Абон ма æрбахуыдтам нæ горæты зындгонд адæмы æмæ Фыдыбæстæйы Стыр хæсты ветеранты. Фæнды сæ, цæмæй нæ кæстæр фæлтæр зоной, не 'мзæххонтæ хæсты цæхæры сæхи куыд равдыстой, уый». Рафаэль Гаспарянц, РЦИ-Аланийы Адæмон артист, киноныв «Забытая победа»-йы режиссер: «Ацы киноныв мах систам 2008 азы. Чысыл раздæр та, 2007 азы нæ республикæйæн радтой æфсæддон кадджын горæты ном. Уыимæ мах киноныв дæр уыцы рæстæджы рацыд. Адæм æй куы федтой, уæд раст зæгъгæйæ, сæ зæрдæмæ фæцыд. Суанг ма фестивальты дæр апарахат. Систам æй Туаты Тиминæйы студийы. Ныридæгæн нын цыдæртæ бантыст. Фæлæ мах бафæндыд, цæмæй ацы киноныв фылдæр адæм феной. Уыйадыл рауагътам дисктæ дæр». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv