Цард уæларвæн снывонд кæнгæйæ

Ивгъуыд фæлладуадзæн бонты Дзæуджыхъæуы аэродромы æрæмбырд сæдæгай адæм. Хуымæтæджы нæ. Иууылдæр зæрдиагæй æмæ æхсызгонæй бакастысты парашютистты æмæ иттæг фæлтæрдджын тæхджыты арæхстдзинадмæ. Цъæх арвы тыгъдады уыдон равдыстой уæлдæфон программæ. Ахæм хуызы Цæгат Ирыстоны сбæрæг кодтой Уæрæсейы уæлдæфон флоты бон. Кадджын мадзалæн æвдисæн фæцис не сфæлдыстадон къорд дæр. Уæлдæфон авиаци у æфсады дæлхайæдтæй иуыл ахсджиагдæр. Уымæ гæсгæ парашютисттæ сарæзтой сæ арæхстдзинæдтæ æвдисæн программæ. Фæсивæд парашютимæ гæпп кодтой куыд Ирыстоны æмæ Уæрæсейы, афтæ уæлдæфон-десантон æфсады æмæ æфсæддон-уæлдæфон тыхты тырысатимæ. Ирон цæргæстæ 1300 метры бæрзæндæй куыд рапæррæст кодтой, уый фенгæйæ бирæты зæрдæтæ æхсызгон æнкъарæнтæй байдзаг сты. Константин Колесников: «Афтæ фæзæгъынц,æмæ дам адæймаг парашютимæ куы рагæпп кæна, уæд æппындæр ницæмæйуал тæрсдзæн. Тынг рæсугъд æмæ цымыдисаг у, фæлæ парашютимæ рагæпп кæнынæн стыр ныфс æмæ лæгдзинад хъæуы. Уый мæ зæрдыл дарын, фæлæ мæ уæддæр фæнды сахуыр кæнын, æмæ арæхсджын парашютист суæвын». Дæсныйад æвдисæг программæйæ уæлдай ма уазджыты барæвдыдтой тæхджытæ уæларвы куыд зилдух кодтой ,уымæй. Æппæтæй цымыдисагдæр уыд реактивон хæдтæхæг Л-29. Тæхджытæ равдыстой сæ арæхстдзинад, алыхуызон техникон элементтæ æмæ зын уæларвон фигурæтæ. Æмæ кæд авиацийы службæгæнджытæн сæ æрвылбоны архайд у, уæд æрбацæуджытæн та цымыдисаг равдыст. Арвы тыгъдадмæ стахтысты хуыздæрты-хуыздæртæ. Нæ республикæйы граждайнаг æмæ æфсæддон флоты тæджытæ. Козырты Руслан: «Хæдтæхæгыл иу хатт дæр куы атæхай, уæд дæм цы æнкъæрæнтæ фæзынд, уыдоны тыххæй ирддæрæй радзурдзынæ. Фыццаджыдæр, зæххыл нæ уыдзынæ, фæлæ уæларвыл, алцыдæр у рæсугъд. Уымæй уæлдай ацы машинæ иу къухæй скъæрæн дæр ис. Тæхджытæ, парашютимæ чи тæхы, уыдон дæр сæ куыстыл тынг æнувыд сты. Кæсдызстут, уæ цæстытæ цæхæртæ куыд акалдзысты, уымæ». Бæрæгбонмæ ссыдысты, растдæр зæгъгæйæ та хæдтæхæг СП-30-ыл æрбатахтысты, Цæцæны республикæйы минæвæрттæ дæр. Уый фæстæ та арв иу кæронæй иннæмæ басгæрстой планертæ. Уый та хæдтæхæг АН-2 æххуысæй. Планер иу æмбæлгæ бæрзæндмæ куы систа, уæд æй суæгъд кодта æмæ иу йæхи бынмæ ныццавта. Афтæ кæрæдзийы ифтой. Фенæн дзы уыдис «Бланик»Л-13 -сæрмагонд ахуырадон планер, авиацийы ма йæ хонынц-спарка. Советон Цæдисы рæстæджы йæ балхæдтой Чехийы, уæдæй абонмæ дæр дзы пайда кæнынц. Иннæ ахуырадон планертæй ницæмæй хицæн кæны - бынат дзы ис дыууæ адæймагæн . Сæ иумæйаг уæз хъуамæ 300 килограммæй фылдæр ма уа. Æппæт сусæгдзинæдтæ хынцгæйæ, планер стæрæн ис цалдæр мин киллометры бæрзæндмæ. Уæд йæ бон у 28 киллометры фæтæхын. Уæлдæфы вæййы 6 сахаты бæрц. Уæлдæфон бæрæгбонмæ зæрдиагæй кастысты кадджын уазджытæ дæр - Уæлдæфон флоты ветерантæ. Бедойты Руслан йæ æфсæддон фæндаг райдыдта курсантæй. Йæ фæлтæрддзинадæн ын стыр аргъ скодтой. Ссис Карпатты цур æфсæддон змæлды авиацийы командыгæнæг. Йæ *фсæддон интернационалон хæс æххæст кодта Египет æмæ Йемены ркспубликæйы. Уæрæсейы æфсæддон-уæлдæфон тыхтæн фæлæггад кодта 30 азы. Уæлдæфон æфсадмæ бар чи нæ дары, уыдонмæ афтæ фæкæсдзæн, æмæ авиацимæ хауынц æрмæстдæр хæдтæхджыты æмæ планерты пæррæстытæ æмæ парашютимæ гæппытæ. Уый стыр рæдыд у. Æфсады ацы дæлхайадмæ ма хауынц мингай граждайнаг хæдтæхджытæ дæр, уыдон та æрвылбон дæр адæмы хæццæ кæнынц иу горæтæй иннæмæ, иу бæстæйæ- æндæр бæстæмæ. Чи сыл кусы, уыдон та цæсты гагуыйау хъахъхъæнынц сæ удтæ æмæ се`нæниздзинад сæ къухты чи бавæрдта, уыцы адæмы. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv