Цæгат Ирыстоны паддзахадон ансмабль «Алан» фæнд кæны байгом кæнын ирон кæфтыты хайад

Цæгат Ирыстоны паддзахадон ансмабль «Алан» фæнд кæны байгом кæнын ирон кæфтыты хайад. Уый тыххæй фехъусын кодта паддзахадон ансамблы аивадон разамонæг Тедеты Руслан. Йæ ныхæстæм гæсгæ, уыцы хуызы национ кæфтытыл бæстондæрæй бакусдзысты. Ныртæккæ къорд зоны Цæгат Кавказы адæмыхæттыты кæфтытæ. Зæгъæм, симд, хонгæ, лезгинкæ, кæсгон кафт æмæ æндæдртæ. Ансамблы хыгъды ис 70-ай адæймаджы. Арæх абалц кæнынц нæ бæстæйы алы горæттæм, уыимæ фæсарæнтæм дæр. Тедеты Русланы ныхæстæм гæсгæ, стыр ахъаз у, репертуары кæфтыты егъау нымæц. Уый сын фадат дæтты Цæгат Кавказы алы регионтимæ хæлардзинады бастдзинæдтæ аразын. Ацы аз та ноябры ансамбль архайдзæн концерты «Сияющие вершины Кавказа», зæгъгæ. Ацæудзæн Мæскуыйы, Кремлы паддзахадон галуаны. Уæ зæрдыл уын æрлæууын кæндзыстæм, ансамбль «Алан»-æн бындур æвæрд æрцыд 1938-æм азы, Кокойты Тæтæрхъаны хъæппæрисæй. Уæды рæстæг сфæлдыстадон къорд фылдæр заргæ кодта. Кафтыты ансамбль сси 1966-æм азы. Дыууæ азы фæстæ йæ разамонæг сси Уарзиаты Хадзысмел æмæ уæд къордæн радтой йæ ныртæккæйы ном. Ныр дæр та ирон театры сценæйыл фæлтæрдджын артисттæ æвдисынц сæ алæмæты курдиат. Кафджыты къорд хорзæхджын у бирæ æппæтдунеон фестивалты майдантæй, у Хетæгкаты Къостайы номыл премийы лауреат, æппæтуæрæсеон æмæ дунеон конкурсты уæлахиздзау. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv