«Хирурджы» куыст

Мысан акъуырынæн æрмæст цæхæрцæст уæвын фаг нæу. Хæцæнгарзæй æхсджытæ ма хъуамæ æппынæдзух сæ дæсныйадыл æмæ арæхстдзинадыл кусой. Уый тыххæй рæстдзæвинтæ сæ ерыстæ дæр нæ цух кæнынц. Бон раздæр Цæгат Ирыстоны ахицæн сты Уæрæсейы хъайтар Медойты Игоры номыл арæзт ерыстæ спортивон снайпингæй. Æрæфы районмæ сæмбæлыдысты æгас Уæрæсейы хуыздæр æхсджытæ. Бæлвырддæр хабæрттæ турниры тыххæй радзурдзæн нæ уацхæссæг. Иу миллиметр рахизырдæм кæнæ галиуырдæм дæр тынг вазыгджын у спортивон æхсты хæцæнгарзæй. Цæмæй йæ арæхстдзинад ма сафа, уый тыххæй рæстдзæвин хъуамæ æппынæдзух йæхиуыл куса. Æрæфы районы полигонмæ ерыстæм æрбацыдысты Уæрæсейы алы къуымтæй. Владимир, цæгатаг-хурныгуылæны федералон зылды сæрмагонд хайады кусæг : «Нæ фæлтæрддзинад фæхъæздыгдæр кæнынæн ацы ерыстæ сты тынг пайда. Иуæй иннæ хуыздæр рæстдзæвинтимæ æмрæнхъ æрлæууын у хорз практикæ. Уый тыххæй æрбацæуæм ардæм. Турнир у тынг кадджын. Мах ныртæккæ Цæгат Ирыстоны стæм куыстадон балцы. Ацы ерыстæ сты нæ балцы кæронбæттæн мадзал. Сæ руаджы сбæрæг кæнæм, снайпинджы цæуыл сахуыр стæм, уый». Ерысты хатдзæгтæм гæсгæ тæрхон хæссынц æрмæстдæр профессионалтæ. Алы къордмæ дæр йæ цæст дары хицæн адæймаг. Уый кæсы, цæмæй спортсментæ ерыстæ фæтк ма халой. Эксперты ныхæстæм гæсгæ, алы архайæгæн дæр фадат ис æппæты хуыздæр рæстдзæвинимæ ерысы бацæуынæн. Уæлдай ахджиаг цау та у Цæгат Ирыстойнаг æхсджытæн. Се `мкусджытæй бирæ цæуылдæрты сахуыр вæййынц. Алыксандр Тотыккаты, тæрхонгæнæг: «Архайджытæ сæ фæлтæрддзинад кæрæдзийæ нæ сусæг кæнынц, иумæ архайынц. Мæнмæ гæсгæ, ацы ерыстæ сты тынг вазыгджын. Уыимæ канд рамбулыны тыххæй нæ, фæлæ архайджытæ сæ дæсныйады сусæгдзинæдтæ кæрæдзийæн кæй не вгъау кæнынц, уый тыххæй дæр. Стæй ма хорз уый у, æмæ ацы æрыгон спорты хуыз нæ республикæйы кæй парахат кæны». Ерыстæм каст фæлтæрдджын æхсæг Медойты Игорь. 90-æм азты ирон рæстдзæвин ахуыр кодта æхсджыты æппæт Уæрæсейæ дæр. Медойты Игорь стыр аргъ скодта Цæгат Ирыстойнаг æхсджытæн. Йæ ныхæстæм гæсгæ, мысан къуырын у хирурджы куыстимæ абаргæ. Игорь Медойты, инæлар-майор запасы, Уæрæсейы хъæбатыр: «Хæрзæрæджы дæр ма рæстдзæвин нымад уыд ахæм æфсæддоныл, хæсты быдыры архайын кæй хъуыд. Уым каст æрдзы уавæртæм. Ныр та сæ фылдæр ахуыр кæнынц горæты мидæг кусыныл, террористты ныхмæ тох кæныныл. Уый фæдыл хъæуы ахæм æхсджыты цæттæ кæнын, горæты уавæрты рæдийгæ чи нæ кæна, мысан раст куыд къуыра, хуымæтæг адæмæн хъыгдард куыд нæ хæсса. Раст хирурджы хуызæн хъуамæ арæхса снайпер». Ерыстæ цыдысты 3 боны. Спортсментæ сæ арæхстдзинад равдыстой алы уавæрты. Турниры кæрон уæлахиздзауты схорзæхджын кодтой зæрдылдарæн лæвæрттæй. Мадзал аразджытæ баззадысты разыйæ турниры хатдзæгтæй. Зæрдæ бавæрдтой, фидæны дæр æй кæй араздзысты. Биджелты Бертæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv