Цæгат Ирыстоны байгом кодтой тарнизы нызмæ тох кæнынæн ног диспансер

Куыд ма хъусын кодтам, афтæмæй нæ республикæйы байгом тарнизы ныхмæ тохгæнæг ног диспансер. Афæдз æмæ `рдæг рацыд, аразын æй куы райдыдтой, уæдæй. Æмæ кæдæй-уæдæй уыцы куыст кæронмæ æрхæццæ. Кадджын бæрæгбонмæ ма суанг Уæрæсейы Хицауады сæрдары хæдивæг Виталий Мутко æмæ Уæрæсейы æнæниздзинад хъахъхъæныны министр Вероника Скворцова дæр ссыдысты. Тарнизы диспансерæй уæлдай ма цы федтой, уый тыххæй бæлвырддæрæй базондзыстут нæ программæйы æрмæгæй. Загътой æмæ йæ бакодтой! Республикæйы хицауад тарнизы ног диспансеры кой фыццаг хатт куы скодта, уæд адæмæй бирæты уырнгæ дæр нæ бакодта æмæ йæ сараздзысты. Фæлæ ныхæстæ сæ хъузгæй хъуыддагмæ рахызтысты. Медицинон кусæндонæн аккаг аргъ скодтой федералон уазджытæ дæр: Виталий Мутко æмæ Вероника Скворцова. Æнæниздзинад хъахъхъæныны министр куыд загъта, афтæмæй Цæгат Ирыстоны фæлтæрддзинадæй спайда кæнæн ис æгас бæстæйы дæр. Уæлдайдæр, тарнизимæ тохæй. Уазджытæ сæхи цæстæй федтой ног диспансеры авналæнтæ. Хирургион хайад, исæн, карджын адæмы æмæ сывæллæтты поликлиникæтæ, стæй бирæ æндæр хайæдтæ ифтонг сты тæккæ нырыккондæр хуызы. Рынчынты искуыдæм цæуын нал хъæуы ныр сæхи дзæбæх кæнынмæ. Уæрæсейы Хицауады сæрдары хæдивæг Виталий Мутко ахæм бæрæггæнæнтæй разы у. Куыд зæгъы, афтæмæй ахæм нырыккон кусæндæттæ хъуамæ фылдæр уа æппæт бæстæйы. Раздæр ацы диспансер йæхи цæстæй чи федта, уый ныр ацы кусæндон зонгæ дæр нал бакæнид. Æрдæгпырх къултæ, кæддæры зæронд кусæнгæрзтæ, коммуналон æвадатдзинад - æппæт уыдæттæн сæ кой дæр нал ис. Ног диспансеры арæзтад федералон хицаудзинады раз йæ рæстæджы æрæвæрдта Битарты Вячеслав. Æмæ сæ абон бузныг у, йæ ныхасмæ йын хъусæг кæй разындысты. Ног корпустæм уал раивтой 248 рынчыны. Зæронды бæстыхайы бынаты та хъуамæ саразой сывæллæтты рынчындон. Виталий Мутко, Вероника Скворцова, Битарты Вячеслав æмæ ма сыл Цæгат Кавказы хъуыддæгты фæдыл министр Сергей Чеботарев дæр бафтыд, афтæмæй ацыдысты медицинон æндæр кусæндæтты уавæр дæр фенынмæ. Сæ фæндаг ракодтой онкологон диспансерыл. Йæ уавæр сæ хæрзтæй нæу уымæн дæр. Вероника Скворцова фæнысан кодта, æгæр зæронд технологитæ æмæ коммуналон æгъдауæй цауд кæй у, уый. Зæрдæ бавæрдта, национ проекты фæлгæты Дзæуджыхъæуы ног онкологон диспансер кæй фæзындзæн, уымæй. Спайда кæндзысты, цы миллиард сомы хъуамæ радих кæной уыцы хæстæм, уыцы фæрæзтæй. Рæстæгæй йыл хъуамæ бахардз кæной 2 азы. Æххуыс хъæуы Беслæны медицинон центры дæр. Вероника Скворцова сæм куы `рцыд уазæгуаты, уæд байхъуыста дохтыртæм. Рабæрæг, арæх сæ техникæй кæй асæтты. Министр сын зæрдæ бавæрдта баххуыс кæнынæй. Уыцы рæстæг та уал Виталий Мутко зонгæ кодта Дзæуджыхъæуы æндæр объекттимæ. Цæгат Ирыстоны цæрæнуæтты коммуналон хæдзарады министр Тамайты Майран йын бæстон радзырдта, горæтмæ дондзæуæнты тыххæй. Сты тынг цалцæггæнинаг. Виталий Муткойы хъуыдымæ гæсгæ, уымæн дæр ис хос скæнæн. Уазджытæ ма федтой Ногиры сыгъдæггæнæнтæ дæр, бабæрæг кодтой фæлладуадзæн парк, стæй Национ музей. Уæдæ Сабырдзинады проспектыл дæр атезгъо кодтой. Уæрæсейы Хицауады сæрдары ныхæстæм гæсгæ, республикæйæн кæндзыст ахадгæ æххуыс. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv