Алагиры культурæйы хæдзар «Комсомолец»-ы рацарæзт кæронтмæ æрхæццæ

Сабиты худт æмæ музыкæйы зæлтæ ацы бынатæй бирæ рæстæг нæ хъуысыдысты. Бæстыхай сарæзтой 1948 азы. Фæстаг 20 азы уыд афтид, 2017-æм азы та «Комсомолец» уæвгæ дæр сæхгæдтой. Йæ рацаразыны фæдыл бардзырд фарон сæрды бафыста республикæйы сæргълæууæг Сергей Меняйло. Куыстытæ сæххæст кодтой рæстæгыл. Фæлæ дзы къуылымпыдзинæдтæ дæр уыд. Кæд цалцæг, уæд бындурон. Ногæй раивтой алцыдæр: бæстыхайы сæр, электрон тыхы телтæ, рудзгуытæ, дуæрттæ. Уæдæ аивгæнæн куыстытæ дæр бакодтой, ныр ам ис ног хъармгæнæн системæ. Ацы æхсызгон цаумæ Алагиры цæрджытæ бирæ азты æнхъæлмæ кастысты. Рацарæзт æмæ техникон ифтонгадæн рахай кодтой 75 млн сомы. Ам ис кинотеатр, концертон зал, кабинеттæ æмæ сценæмæ рахизыны размæ хи цæттæ кæнæн уаттæ. Уымæй уæлдай, санитарон агъуыстытæ. Уæдæ буфет дæр уыдзæн «Комсомолец»-ы. Национ проект «Культурæ»-мæ гæсгæ Алагиры цалдæр объекты сцалцæг кодтой. Специалисттæ куыд зæгъынц, афтæмæй бæстыхай цæттæ у. Раздæр ацы бынат цæрджытæн уарзон уыд, ам кастысты кинотæм, кафыдысты, æхсызгонæй æрвыстой сæ рæстæг. Æмæ культурæйы хæдзары ногæй цард æнхъæвзын райдайдзæн.