Цæгат Кавказы кинохроникæйы студийы райрæзтыл бакусдзысты

Цæгат Кавказы кинохроникæйы студийы райрæзтыл бакусдзысты. Культурæйы министр Къубалты Эльбрусы ныхæстæм гæсгæ, фыццаг уал æй рахæсдзысты республикæйы исбонадмæ. Уый фæстæ паддзахадон æмæ хицæн адæймæгты æхцайы фæрæзты руаджы йæ райрæзтыл бакусдзысты. Уый тыххæй та хъæуы Цæгат Кавказы регионты инвесторты æргом ацы фарстамæ раздахын. Цæгат Кавказы студи куы сног кæной, уæд уый фадат ратдзæн ног кинонывтæ исынæн æмæ ацы дæсныйадыл ног фæлтæр сахуыр кæнынæн. Фæлæ уымæн, фыццаджыдæр, хъæуынц фæрæзтæ. Ныр ма уал нæ республикæйы хицауад архайы, цæмæй студи Цæгат Ирыстоны исбонадмæ рахиза. Уый фæдыл рæмбырд кодтой æппæт хъæугæ гæххæттытæ. Кæд раздæр уыд федералон исбонады хыгъды, уæд ныртæккæ хъуамæ суа регионалон. Къубалты Эльбрусы ныхæстæм гæсгæ, ма фæнд кæнынц студийы хицæутты совет саразын. Йæ хыгъды уыдзысты уæрæсейаг кинойы алы фæлтæры хъуыстгонд кусджытæ. Уыимæ ма, куыд зæгъы, афтæмæй Цæгат Ирыстоны ныридæгæн ис, кинойы куыст чи сног кæндзæн, ахæм кадртæ. Ацы дæсныйадыл цæгатирыстойнаг студенттæ ахуыр кæнынц Мæскуы æмæ Санкт-Петербургы уæлдæр ахуыргæнæндæтты. Фæнд кæнынц Цæгат Ирыстоны паддзахадон университеты бындурыл суинаг кинематографистты цæттæ кæнын. Нæ республикæйы культурæйы министр ма куыд бафтыдта, афтæмæй фæстаг рæстæг Цæгат Ирыстоны киномæ цæстæнгас фæхуыздæр ис. Киноиндустрийы куыст та хорз ахъаз фæуаид экономикæйы рæзтыл. Уыима ма суаид политикон æмæ культурон имиджы ахсджиаг хай. Уæ зæрдыл уын æрлæууын кæндзыстæм, Цæгат Кавказы кинохроникæйы студи арæзт æрцыд 1946 азы. Йæ куысты рæстæг ист æрцыд 500 документалон, ахуырадон æмæ наукон-популярон кинонывы. Фæстаг киноныв дзы систой 2013-æм азы. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv