Сергей Меняйло амыдта оперативон штабы æмбырд

Коронавирусæй рынчынты нымæц Цæгат Ирыстоны дарддæр къаддæр кæны. Ивгъуыд къуыриимæ абаргæйæ, сты 4,7 % къаддæр. Уый тыххæй оперативон штабы æмбырды фехъусын кодтой Уæрæсейы фæлхасгæнджытæм цæстдарды управленийæ. Уый хыгъд, республикæйы дзæбæхгæнæндæтты ныртæккæ ис 661 адæймаджы. Æнæниздзинадмæ цæстдарды управленийæ куыд фехъусын кодтой, афтæмæй регионы медицинон уагдæтты дзæбæхгæнæн бынæттæн сæ 30% у уæгъд. Ныртæккæ сывæллæтты клиникон рынчындоны Ковид-инфекциимæ ис 65 пациенты, уыдонæй 3 сты уæззау уавæры, 1 — реанимацийы. Æмбырды æрдзырдтой вакцинацийы фарстатыл дæр. Къуырийы дæргъы хæцгæ низы ныхмæ прививкæ скодтой 8800 цæрæджы. Уый къаддæр у, раздæримæ абаргæйæ. Профилон ведомствæйæ куыд фехъусын кодтой, афтæмæй, 60 азæй фылдæр кæуыл цæуы, уыдонæй ковиды ныхмæ иммунизаци ацыдысты æрмæст 28,9%. Æмæ кæд коронавирусӕй рынчынты уавæр гыццыл фæхуыздæр, уæддæр иумӕйагӕй эпидемиологон уавæр сӕ хуыздæртæй нæу. Республикæйы парахат кæны æхснырсæг. Тагъд æххуысы станцæйы разамынды ныхæстæм гæсгæ, дохтыртæм чи фæсиды, ахӕмтӕ дæр фылдæр кæнынц. Сæйрагдæр, цæрджытæ дзурынц грипп æмæ æхснырсæджы тыххæй. Регионы ахуырад æмæ наукæйы министрадæй та куыд фехъусын кодтой, афтæмæй ныртæккæ дистанцион хуызы ахуыр кæнынц 34 къласы. Вице-премьер Александр Реутовы ныхæстæм гæсгæ, æнæниздзинады уавæр фаг кæй нæ фæхуыздæр, уый тыххæй эпидемиологон мадзæлттæ фæлæмæгъдæр кæныны афон нӕма у. Аппаратон æмбырды кæронбæттæны республикæйы сæргълæууæг Сергей Меняйло фæсидт, цæмæй улæфæн бонты дæргъы цæрджыты æнæниздзинадмæ уа уæлдай цæстдард. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv