Ансамбль «Нарт» фесгуыхт адæмон сфæлдыстады фестивалы Санкт-Петербурджы

Иугæр сфæлдыстады кой кæнæм, уæд ма Санкт-Петербургмæ дæр авналæм. Ацы горæты цæрæг ирон адæмы æхсæнады бæрны чи ис, адæмон кæфтыты ансамбль «Нар»" архайдта Кавказы адæмыхæттыты культурæйы фестивалы. Аразгæ дæр æй уыцы горæты скодтой. Уый тыххæй хъусын кæны Цæгат Ирыстоны нациты ахастдзинæдты фæдыл министрады пресс-службæ. Ансамблы уæнгтæ йæм сæхи зæрдиагæй бацæттæ кодтой æмæ дзы фесгуыхтысты. Фестивалы равдыстой «Симд», «Хонгæ» æмæ «Хæххон кафт». Сæхимæ адæмы афтæ `ркæсын кодтой, æмæ сæ æнæ лæвар ничиуал ауагъта. Ансамблы къорды уæнгты сæ ирд курдиаты тыххæй схорзæхджын кодтой кады дипломтæй. Фæнысан ма кæндзыстæм уый, æмæ ацы фестиваль Санкт-Петербурджы саразынц æрвылаз дæр. Фæархайынц дзы горæты хуыздæр кафджыты æмæ зæрæггæнджыты къордтæ. Ирон адæмæй хъауджыдæр ма дзы сæ арæхстдзинæдтæ равдисынц абхазаг, азербайджайнаг, сомихаг, дагестайнаг, цæцæйнаг æмæ æндæр адæмыхæттыты минæвæрттæ. Фестивалмæ уазæджы номыл чи `рбацыд, уыдон ма йæ фæлгæты базонгæ сты Кавказы цардыуаг æмæ `гъдæуттимæ, стæй бынæттон æрмдæсныты курдиатимæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv