Адæмон куыстæн адæмон ном

Театры хъуысмæтыл кæд дзурæм, уæд зæгъын хъæуы хæдахуыр театралон къорды тыххæй. Уыдон дæр æнæрынцайгæйæ архайынц, цæмæй адæмы ивады æууæлтимæ базонгæ кæной. Сæ хæсыл нымайынц, уыцы ном хæддыхæй хæссын. Уый тыххæй та сæ фæхъæуы алы 3 азы дæр адæмон ном хæссыны бар бахъахъхъæнын. Куыд театралон къордтæ, афтæ кафджыты къордтæ дæр. Нæ республикæйы ис 200 хæдахуыр кафджыты ансамбльæй фылдæр. Уыдон дæр саразынц равдыстытæ. Афтæмæй хуыздæртæн саккаг кæнынц «адæмон къорд»-ы нæмттæ. Æмæ уый, хуымæтæг хъуыддаг нæу. Ахæм ном райсынæн хъуамæ æмбæлгæ домæнтæн дзуапп дæттой. Абон ахæм мадзал сарæзтой Октябрскæйы. Культурæйы галуаны æрымбырд сты хъæуты кафджыты къордтæ. Сæ тыхтæ фæлвæростой. Уым уыд нæ уацхæссæг Пелиты Сабинæ. Бацæттæ кодта æрмæг æмæ цæм бакæсæм. Аккаг сты адæмон къорды ном хæссынæн æви нæ? Абон та Октябрьскæйы КУЛЬТУРÆЙЫ галуаны æрæмбырд сты аивадимæ æмгом баст адæм. Сæ куыстæн цын хатдзæгтæ æнæмæнгæй хъуамæ скæной. Сæ курдиаты тых ам радон хатт равдисдзысты Горæтгæрон районы хæдахуыр артисттæ. Сæ аивадæн сын аккаг чи кæндзæн, уыдон дæр сты цæттæ. Уæдæ ма бакæсæм се сфæлдыстадон арæхстдзинадмæ. Октябрскæ, Комбилеевкæ, Тарскæ æмæ Сунжæйы фæсивæдæн абон у æцæг бæрæгбон. Чидæр сценæмæ кафынмæ фыццаг хатт рахызт, чидæр та ныридæгæн фæлтæрджын кафæг у. Сæрмагонд къамисы уæнгтæ цымыдисæй кæсынц æрыгон артисттæм. Алы змæлд дæр у ахсджиаг. Кафты рæсугъддзинад элементтæй арæзгæ у. Сценæмæ рахизын æмæ курдиат равдисын æнцон нæу. Зæрдæ нырхæдæг вæййы. Ахæм мадзал саразынц 3 азы мидæг иу хатт. Къамисы ныхæстæм гæсгæ сты пайда æмæ ахсджиаг. Уый та уымæн, æмæ суинаг артисттæ рæзынц. Хиуыл кусын та хъæуы алкæддæр. Алы къорд дæр бацæттæ кодта фæйнæ 7 кафты. Сæ разамонджыты ныхæстæм гæсгæ, алы саби дæр уæлдай бæстондæрæй бацæттæ кодта. Кæд сын зын у, уæддæр тырнынц уæлдæр къæпхæнтæм. Аивадон бæрæгбон ныридæгæн уыд Черменыхъæуы, Елхоты æмæ Сунжæйы. Дарддæр сæ курдиат æвдисдзысты æндæр районтæм. Хъæуты чысыл къордтæн стыр фидæн кæй ис, ууыл дызæрдыг æппындæр ничи кæны. Пелиты Сабина _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv