Хъэæугæ ногдзинад

Уæрæсейы æппæт скъолатæ дæр цæттæ кæнынц кæронбæттæн ныхасмæ. Иумæйаг паддзахадон фæлварæн радтыны фæткмæ ивддзинæдтæ бахастой фарон. Ацы аз та скъоладзаутæн фæлварæны архайыны бар ратдзæн кæронбæттæн ныхас. Сараздзысты йæ 13-æм февралы. Æрыдоны фыццæгæм скъолайы ахуыргæнинæгтæ сæхи цæттæ кæнынц кæронбæттæн ныхасмæ. Сæрмагонд чингуытæм гæсгæ архайынц текст аив кæсын æмæ йæ сæхи ныхæстæй дзурыныл. Кæронбæттæн фæлварæн æнтыстджынæй кæй ратдзысты, ууыл дызæрдыг нæ кæнынц. «Нæ кæрæдзиимæ къаддæр дзурын райдыдтам. Аив ныхас арæх нал фехъусдзынæ. Мæнмæ гæсгæ, ацы фæлварæн нын ратдзæн хорз фадат аив дзурынæн. Нæ хъуыдытæ æмæ 'нкъарæнтæ дзырдтæй æвдисынæн. Февралмæ мæхи афтæ хорз куы цæттæ кæнон, уæд мæ бæрæггæнæнтæ уыдзысты иттæг хорз», — æрыдоны фыццæгæм скъолайы 9-æм къласы ахуыргæнинаг Марина Димитренко. 9-æм къласы ахуырдзаутæн кæронбæттæны ныхасæй фадат уыдзæн иумæйаг паддзахадон фæлварæнтæ радтынæн. Ис дзы 4 хæслæвæрды. Текст аив бакæсын, хи ныхæстæй йæ радзурын, стæй ма дзы цитатæ бавæрын. Пъланмæ гæсгæ, монолоджы хуызы æрныхас кæнын æмæ æвзæрст темæйыл экзаменаторимæ аныхас кæнын. Ахуыргæнджытæ куыд зæгъынц, афтæмæй скъоладзаутæ сæхи æмбæлгæ хуызы бацæттæгæнгæйæ, кæронбæттæн ныхас æнцонæй ратдзысты. «Мах, уырыссаг æвзаджы ахуыргæнджытæ уыдзыстæм эксперттæ. Сывæллæтты ахуыр кæнын фæлварæны сæйраг хæстæ æмæ нысæнттæ æмбарыныл. Уыимæ ма не 'ргом æздахæм, фæлварæны рæстæг эксперттæ скъоладзауты зонындзинæдтæн цы фæткмæ гæсгæ аргъ кæндзысты, уымæ. Уый, æнæмæнг, ахсджиаг хъуыддаг у», - Æрыдоны фыццæгæм скъолайы уырыссаг æвзаг æмæ литературæйы ахуыргæнæг Æккæлаты Азæ. Кæронбæттæн ныхасы сæйраг нысан у ахуырдзауты уырыссаг æвзагмæ арæхстдзинад сбæрæг кæнын. Сæ зонындзинæдтæн сын аргъ кæндзысты «æппæрццæг кæнæ æвæрццæг» системæмæ гæсгæ. Æппæты фылдæр райсæн ис 19 баллы. Фæлæ фæлварæн æнтыстджынæй радтынæн уæвгæ фаг сты 10 баллы дæр. Кæронбæттæн ныхасмæ канд скъоладзаутæ нæ цæттæ кæнынц, фæлæ ма ахуыргæнджытæ дæр. Нæ республикæйы ахуыргæнджыты дæсныйад уæлдæр кæныны институт аразы семинартæ. Фæлварæн сывæллæтæн цæудзæн сæхи скъолаты. Эскперттæ дзы уыдзысты уырыссаг æвзаджы ахуыргæнджытæ, экзаменатортæ та - къласимæ чи куыста, уый. Хъуамæ ахуыргæнинæгтæ фæлварæны рæстæг ма тыхсой. 9-æм къласонтæ кæронбæттæн ныхас радтынæн курдиат хъуамæ бадæттой 30 январы онг. Ныффысæн æй ис, цы скъолаты ахуыр кæнынц, уым. Фæлварæн сараздзысты 13-æм февралы. Сæ бæрæггæнæнтæ дæр уæд сбæлвырд уыдзысты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv