Хъæууон хæдзарады рæзтæн

Цæгат Ирыстоны стыр цæстдард здæхт цæуы хъæууон хæдзарады рæзтмæ. Ахæм куыстуæттæн республикæ æххуыс кæны. Абон Битарты Вячеслав бабæрæг кодта кæсагдарæн хæдзарад Красногоры. Балер кæсаг цæттæгæнæг куыстуат архайы фароны азы июнæй нырмæ. Ныридæгæн у æнтыстджын. Доны фæзуат у 4 мин квадратон метры. Ам 17 бассейны хъомыл кæнынц æмæ дарынц 60 тоннæйы балер кæсаг. Уымæй уæлдай ма хæдзарады ис кæф рæзын кæныны чысыл бæстыхай. Специалистты ныхæстæм гæсгæ, ацы кæсаджы хуызæн ам хорз уавæртæ ис. Битарты Вячеславæн радзырдтой, æлхæнджытимæ дæр зындзинæдтæ кæй нæй. Кæсаг уæй кæнынц æрмæст бынæттон базарты нæ, фæлæ ма Цæгат Кавказы иннæ регионты дæр. Куыстуаты ма ис уазалгонд балер кæсаг бакусыны цех дæр. Йæ хъомыс у 3 тоннæйы суткæмæ. Уазалгонд кæсаг æрвитынц Мæскуымæ æмæ Уæрæсейы иннæ регионтæм. Фæлæ куыстуаты хъæуы рæзын. Фæнд кæнынц стырдæр хъомысадон мадзæлттæм рахизын. Уæд сæ бахъæудзæн фылдæр специалисттæ дæр. Битарты Вячеслав фæндон бахаста, цæмæй республикæйы ахуыргæнæндæтты кæсаджы куыстгæнджыты цæттæ кæнын райдайой. Уымæй уæлдай ма республикæйы сæргълæууæг зæрдæ бавæрдта, куыстаты рæзтæн кæй баххуыс кæндзæн, уымæй. Хæстæгдæр рæстæджы кæсаджы хæдзарадæн радих кæндзысты зæххы хай. Баххуыс ын кæндзысты æхцайы фæрæзтæй республикон программæты фæлгæты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv