ВИЧ-мæ тох кæныны акцийы хатдзæгтæ

Æппæтуæрæсейон акци ВИЧ рабæрæг кæнынæн нæ республикæйы кæронмæ æрхæццæ. Йæ сæйраг хæс у - фарстамæ уæлдай æргом аздахын. 2 боны дæргъы алкæй бон дæр уыди сæрмагонд иртæстытæ ацæуын. Акцийы кæронбæттæны фæдыл Национ музейы æрбамбырд сты нæ республикæйы медицинон къабазы бæрнон кусджытæ. Се 'хсæн уыд нæ республикæйы æнæниздинад хъахъæныны министры хæдивæг Цидаты Татьянæ, Цæгат Ирыстоны медицинон академийы ректор - Олег Ремизов æмæ ВИЧ-имæ тох кæныны регионалон центры сæйраг дохтыр Тауаситы Валерия. Се 'ппæт дæр хæст сты иу хъуыдыйыл, ахæм акцитæ хæссынц стыр пайда, цæмæй адæм бæрнондæр цæстæй кæсой низмæ. Акцийы фæлгæты 400 адæймагæй фылдæрæн сарæзтой сæрмагонд иртæстытæ. Иумæ дæр дзы фиппаинæгтæ нæ разынц. Мобилон пункттæ уыдысты Дзæуджыхъæуы, Мæздæг, Беслæн, Æрыдон æмæ Алагиры. 5-7 минуты рæстæгмæ сæ бон уыди сæ бæрæггæнæнтæ базонын, стæй уый фæстæ специалистимæ аныхас кæнын дæр. Æдæппæтæй акци сараздзысты нæ бæстæйы 40 регионы æмæ 191 горæты. Цæгат Ирыстоны фæстæ экспедици араст уыдзæни Калмыкимæ. 34 регионы ма сæм æнхъæлмæ кæсы. Йæ архайджытæ куыд фæбæрæг кодтой, афтæмæй сæ куыстæй нæ республикæйы баззадысты разыйæ. Андрей Амиров,  акци «Тест на ВИЧ»-ы консультант-психолог: «Фыццаджыдæр мæ уый зæгъын фæнды, æмæ уæ республикæ нæ зæрдæмæ кæй фæцыди. Тынг уазæгуарзон стут. Стæй ма мæ фæбæрæг кæнын фæнды, ацы аз нæ экспедицийы куыст уæлдай кæны уымæй æмæ республикæйы медицинон къабазы кусджытæн сарæзтам семинартæ. Тынг цымыдисæй дзы архайдтой, сæ хъуыдытæ дæр ВИЧ-имæ тох кæныны фæдыл кæрæдзийæн дзырдтой. Уæлдай æхсызгон мын уый у, æмæ æрыгон фæлтæрæй бирæтæ кæй архайдтой акцийы. Хистæр адæм та уæндондæрæй цыдысты иртæстытæ дæттынмæ, нæ пункттæ медицинон уагдæтты цур куы лæууыдысты, уæд. Æдæппæтæй регионы сæрмагонд иртæстытæ радтой 464 адæймаджы». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv