Дзæуджыхъæуы цæуынц æппæтуæрæсеон ерыстæ аивадон гимнастикæйæ

Граци æмæ пластикæ цы у, уый нæ дарддæры æрмæджы хъайтартæ зонынц се 'мгæрттæй хуыздæр. Спорты галуан «Манеж»-ы цæуынц аивадон гимнастикæйæ æппæтуæрæсеон ерыстæ. Фыццаг бынат райсыныл тох кæнынц 600-мæ ввахс адæймаджы. Сты бæстæйы 19 регионæй. Æрмæст Цæгат Ирыстоны номæй турниры архайы 150 спортсменкæйы. Ацы гуырвидауц чызджыты рог, рæсугъд кафт у егъау ныфсы тых æвдисæг. Сæ алы фезмæлд дæр хъуамæ уа æнæаипп. Бæрзонд бæрæггæнæнтæ райсæн ис, дæ программæйы æууæлтæ иууылдæр раст куы сæххæст кæнай, æрмæст уæд. Уæдæ равдыст æнкъарæнтæй дæр хъуамæ æххæст уа. Афтæ бынтондæр зæрдæагайгæ рауайы. Æппæтуæрæсеон ерыстæ «Ступень к Олимпу» æрбамбырд кодтой 585 спортсменкæйы Уæрæсейы 19 регионæй. Æрмæст Цæгат Ирыстоны номæй архайджыты нымæц у 150. Сæ арæхстдзинад æвдисынц куыд къордгай, афтæ сæрмагонд программæты дæр. Турниры архайы Донецкы адæмон республикæйы командæ дæр. Республикæмæ ссыдысты афæдзы размæ. Ерыстæ байгом кæныны кадджын мадзалы бацархайдта республикæйы физкультурæ æмæ спорты минист. Кочиты Сослан раарфæ кодта гимнасткæтæн, йæ зæрдæ сын загъта спорты бæрзонд къæпхæнтæм схизын. Фыццаг боны хатдзæгтæм гæсгæ, дæсныты 'хсæн йæхи хуыздæр равдыста Краснодары гимнасткæты къорд. Куыд нын радзырдтой, афтæмæй уæлахиз сæ къухы бафтыд, мидтыхстыл кæй фæтых сты, уый фæрцы. Ерыстæ ахæсдзысты 23-æм мартъийы онг. Уæлахиздзаутæ хорзæхгонд æрцæудзысты республикæйы Спорты министрад æмæ Аивадон гимнастикæйы федерацийы номæй майдантæ, дипломтæ æмæ зæрдылдарæн лæвæрттæй.