Дзæуджыхъæуы цæуы æппæтадæмон экономикон форум

Цæгат Ирыстоны йæ куыст райдыдта æхсæнадæмон экономикон форум «Южные Ворота». Форум сси æддагэкономикон æмгуыстады рæзты традицион фæзуат. Архайынц дзы амалхъомтæ Цæгат Кавказæй, Азербаджан, Берорусси, Иран, Турк æмæ Сомихæй. Ирыстоны минæвæрттæ форумы архайджытӕ æмæ уазджыты размæ рахастой сæ хуыздæр товартæ. Се 'хсæн æхсыры продуктти, мыд, арæзтадон æрмæг æмæ æрмдæсныты къухтӕй арæзт национ дзауматæ æмæ сувениртæ. Куыстуæттæй иутæ архайынц рагæй æмæ сты æнтыстджын, иннæтæ та нырма кæнынц фыццаг къахдзæфтæ. Экспозицимæ æркæсгæйæ, хицауады сæрдар Дзанайты Барис фæнысан кодта, экспортæн Цæгат Ирыстоны стыр гæнæнтæ кæй ис. Форум «Южные ворота» æрбамбырд кодта Цæгат Кавказы, Стъарапъолы крайы, Азербайджан, Белорусси, Иран, Турци æмæ Арменийы амалхъомты. Йæ фæрцы бæстæты 'хсæн базарадон бастдзинадæн фæзыны ног гæнæнтæ. Ереваны делегаци сæхицæн уый сбæлвырд кодтой дыууæ азы размæ. Бæстæты 'хсæн æмгуыстады райрæзты тыххæй дзырдта республикæйы хицауады сæрдар Дзанайты Барис дæр. Куыд загъта, афтæмæй форумы фæрцы саразæн ис хъæугæ инвестицион проекттæ. Экономикон райрæзты министр Кучиты Зауыр куыд фæнысан кодта, афтæмæй Цæгат Ирыстонӕн хъæуы йæ географион авналæнтæй раст спайда кæнын. Ныхас цæуы Фæскавказ ӕмӕ Хурыскӕсӕйнаг хӕстӕгдӕр паддзахӕдты транспортон бастдзинады потенциал раргом кæныныл. Амлхъомадæн æххуысы мадзæлттыл дзургæйæ та, центр «Мой Бизнес»-ы архайд министр банымадта æнтыстджыныл. Йæ фæрцы бынæттон кондады продукци фенæн ис суанг фæсарæнты дæр. Æппæтадæмон экономикон форум «Южные ворота» Цæгат Ирыстоны сарæзтой æвдæм хатт. Æрвылаз фылдæр кæны йæ архайджыты æмæ æмгуыстады бадзырдты нымæц. Ныртæккæ се 'ргом аздæхтой туризм, базарад, инвестицитæ, стæй агропромышленнон æмæ транспортон комплекстæм. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv