Сывæллæтты низтимæ тох

Хæстæгдæр рæстæг сывæллæтты республикон рынчындоны байгом кæндзысты ног инфекцион корпус. Аразджытæ бацархайдтой æмæ йæ сарæзтой, стæй йæ сифтонг кодтой нырыккон домæнтæм гæсгæ. Уый руаджы-иу рынчынтæ сæ къæхтыл тагъддæр слæудзысты. Сывæллæттæн лæггад кæндзысты, сæ бон куыд у, афтæ нæ, фæлæ ног медицинон домæнтæм гæсгæ. Куыд кусдзæн дзæбæхгæнæндон æмæ дзы цы уавæртæ ис, уый нын рынчындоны дохтыртæ рагагъоммæ равдыстой. Не сфæлдыстадон къордæн сарæзтой экскурси. Уæрæх къæридортæ, рухс палатæтæ. Медицинон процедурæтæн кабинеттæ та аив палатæтæ... Уæдæ лабораторитæ дæр уæлдай зæрдæмæдзæугæ сты, дохтыртæн дзы кусын удæнцой у. Нырыккон техникæ æмæ прибортæ æвдисынц иттæг раст бæрæггæнæнтæ. Рынчын исæн уатмæ куы бахауы, уæд æм æркæсынц, стæй йæ арвитынц, рынчындоны 4 хайадæй кæдæм æмбæлы, уырдæм. Тæссаг æмæ низхæссæг инфекцитæй рынчынты та бакæнынц сæрмагонд æхгæд бокстæм. Бынат сын радих кодтой ног инфекцион корпусы уæллаг уæладзыджы. Уый дæр хорзыл банымайæн ис - рынчынты боксты хайадмæ аласынц рынчындоны къæридорты алывæрсты. Æмæ низ бахæцынæй тæссаг никæмæн у. Ног корпусы ис 20 боксы, раздæр 2 хатты къаддæр уыдысты. Ног инфекцион бæстыхайы бынат ис 100 пациентæн. Ис дзы реанимацион 4 хайады, сæ иу - улæфæнты тæссаг низтæй рынчынтæн, 2 та тъæнгты тынг тæссаг инфекцитæ кæмæ рабæрæг кодтой, уыдонæн. Хайæдтæ ифтонг сты хъæугæ кусæнгæрзтæй æмæ техникæйæ, суанг ма сæм ис хи рентген æмæ УЗИ аппараттæ. Хæстæгдæр рæстæг ма дзы сæвæрдзысты ногтæ. Инфекцион хайады зæронд бæстыхай сарæзтой ивгъуыд æнусы. Фæстаг хатт бындуронæй цалцæггонд куы уыд, ууыл рацыд 30 азæй фылдæр. Æмæ уæд дæр инженерон системæтæ æмæ санитарон-техникон кусæнгæрзтæ нæ баивтой. Ныр ног бæстыхаймæ кæсгæйæ дохтыртæ æмæ медицинон кусджытæ сæ цин æмбæхсгæ дæр нæ кæнынц. Агъуыст æмæ йæ ифтонгдзинад дзуапп дæттынц æппæт домæнтæн. Уæвгæ инфекцион хайадæн ног бæстыхай аразыныл ныхас кæнын райдыдтой 25 азы размæ. Арæх куыд вæййы, афтæ рауад - ныхæстæй æмæ фæндтæй дарддæр хъуыддаг нæ цыд. Бирæ азты ныддæргъвæтин. Фæлæ федералон программæйы руаджы хъуыддаг базмæлыд. 2 азы размæ куыстытæ сног сты. Æмæ йæ ныр ацы мæйы кæрон хъуамæ эксплуатацимæ радтой. Зыхъуаты Жаннæ _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv