«Рагон аивады ног рæстæг»

Нæ республикæйы Промышленность æмæ транспорты министр Хайдарбек Бутов абон кусæг къордимæ бабæрæг кодта куыстуат «Изольдæ». Республикæйы сæргълæууæджы уынаффæмæ гæсгæ, адæмон сфæлдыстады куыст чи кæны, уыдонмæ хицауад фылдæр ргом хъуамæ здаха. Куыстуат Изольдæ та бахауд федералон реестры номхыгъдмæ. Уый тыххæй йын æмбæлы субсидитæ. Хъæугæ гæххæтытæ ныридæгæн арвыстой профилон министрадмæ. Паддзахадон æххуыс дæр ын уыдзæн. Ацы аз, майы куыстуат бацархайдзæн фестивальы. «Русская веста на озере Гарда» хуыйны. Ацæудзæн Италийы. Уый тыххæй кусджытæ цæттæ кæнынц ног коллекци. Бахуыдтой нæ рагфыдæлтæ цы дардтой, ахæм уæлæдарæс. Абон сæ модельер къорды архайджытæн равдыста. Уыдон сын стыр аргъ скодтой. Ног коллекци федта не`сфæлдыстадон къорд дæр. Ирыстоны Годжыцаты Изольдæ æмæ йæ къорды дæсныты куыстытæ чи нæ зоны, ахæм нæй. Цыргъ судзин сынк сынкы фæстæ æфтауы. Хуыйæг зæрдиагæй архайы ног къабайыл. Ам се ппæт куыстытæн ис иу сæйраг нысан – ирон аивад æмæ æгъдау бахъахъхъæнын. Куыстуат фæзынд 1994 азы. Æмæ уæдæй абонмæ Ирыстоны иу чызг нæй, Изольдæйы кусджыты къухтæй хуыд къабатæ йæхиуыл абарын кæй нæ фæнды. РЦИ-Аланийы промышленность æмæ транспорты министр Бутов Хайдарбек: «Изольдæ у Ирыстоны æцæг патриот. Цы къабатæ аразы, уыдон бацæттæ кæнынц зæронд эскизтæм гæсгæ. Музейы экспонаттæм гæсгæ. Уый у нæ традици æмæ йæ Изольдæ йæ кусджытимæ адæмы хсæн парахат кæны. Йæ куысты хуыздæр æвдисæн, мæнмæ,гæсгæ, у йæ этнокостюмты коллекци». Абон «Изольдæ» у зындгонд бренд. Йæ къабатæ апарахат сты æрмæст Цæгат Кавказыл нæ, фæлæ ма фæсарæнты дæр. Сæ дипломтæ æмæ кады гæххæтыты нымæц бæрæг дæр нæу. Къаба бахуыйыны размæ ам рафæлдахынц историйы сыфтæ. Алы орнамент дæр саразынц археологон куыстыты руаджы цы зæронд дзаумæттæ ссарынц, уыдонмæ гæсгæ. Къабаты 80 проценты бахуыйынц къухæй. РЦИ-Аланийы æхсæнадон палатæйы сæргълæууæг Нина Чиплакова: «Мах, æхсæнадон палатæйы номæй, фæнды баххуыс кæнын Изольдæйæн. Махмæ ис президенты грантты фонд. Уый æхууыс кæны парахат кæнын ахсджиаг культурон проекттæ. Ацы куыстуатæн грант райсынæн æпæтт домæнтæ дæр дзуапп дæтты». Æртæккæ дизайнертæ цæттæ кæнынц ног коллекци «Новое время древнего искусства-2», зæгъгæ. Равдисдзысты йæ майы мæй Италийы. Фестиваль «Русская весна на озере Гарда»-йы. Уырдæм аласдзысты 18 костюмы. Уыдонæй 9 уыдзысты этно-костюмтæ, 9 та разгæмттæ. Италийы цæрджытæн ирон культурæ хæстæг кæй у, уымæн æвдисæн у иу хуымæтæг Италиаг бинонты чындзæхсæв дæр. ООО «Изольда»-йы генералон директор Годжысаты Изольдæ: «Нæлгомаг Италийы цæрæг у, сылгоймаг та Украинæйæ. Бирæ азты иумæ цæрынц. Бафæндыд сæ уарзондзинад закъонмæ гæсгæ дæр сфидар кæнын. Интернеты нын нæ куыстытæ федтой. Стæй бакастысты ирон чындзæхсæвы æгъдæутты тыххæй. Сæ зæрдæмæ афтæ тынг фæцыдысты æмæ сфæнд кодтой сæ чындзæхсæв дæр ирон æгъдаумæ гæсгæ скæнын. Мах сын бахуыдтам разгæмттæ æмæ цъухъатæ. Уымæй уæлдай ма сæ чындзæхсæвы акодтой хонгæ кафт дæр». Къабатæ бахуыйынæн хъуымац ласынц Туркæй æмæ Италийæ. Æвзист рæттæ æмæ риуы æгънæджытæ аразынц Цæгат Кавказы хуыздæр ювелиртæ. Иу къаба бахуыйыныл ацæуы дыууæ мæйы онг. Бирæ æрыгон дизайнертæн «Изольдæ»-йы кусын у сæ бæллиц. Уымæ гæсгæ куыстуат баныхас кодта хуыйджыты лицеимæ æмæ алы къуыри студенттæн саразынц дæсныйад æвдисæн ахуыртæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv