Паддзахадон телерадиокомпани «Алани» бæрæг кæны 3 юбилейы

Радио, телеуынынад æмæ кино. 3 юбилейы бæрæг кæны Паддзахадон телерадиокомпани «Алани». 60 азы дæргъы фæлтæрдджын æмæ дæсны специалисттæ информацион æмæ тематикон равдыстытæ цæттæ кæнынц æмæ æвдисынц республикæйы цæрджытæн. Уæдæ цал æмæ цал кинонывы ист æрцыд Цæгат Ирыстоны кинстудийы 55 азмæ. Радиойы истори та у æппæтæй рагондæр — æххæст ыл кæны 90 азы. 90 азы Аланийы радио Ирыстоны цæрджыты зонгæ кæны республикæйы фæстаг æмæ ахсджиагдæр хабæрттимæ. Уæдмæ дзы зæлыдысты номдзыд дикторты хъæлæстæ. Телеуынынады фæзынды размæ æппæт информаци дæр адæм зыдтой радиойы руаджы. Йæ ахадындзинад абон дæр нæ сæфы. Аланийы радиойы эфиры канд хабæрттæ фехъусæн нæй. Музыкалон æмæ ирхæфсæн программæтæ. Социалон темæтыл ныхас, аналитикæ. Юбилейы фæдыл та райсомæй радиойы райдыдтæ егъау марафон. Комкоммæ эфиры дзы архайдтой телерадиокомпанийы раздæры æмæ абоны кусджытæ, программæты уазджытæ æмæ радиомæхъусджытæ. Ныр та Аланийы радиойы уылæнтæм байхъусын у æнцондæр. Юбилейы фæдыл бацæттæ кодтой радиомæхъусджытæн лæвар. Фæзынд мобилон уæлæфтуан. Йæ фæрцы равзарæн уыдзæн дыууæ уылæны. Хъуыддаг сарæзтой ПТРК-йы генералон директоры хæдивæг Рифат Сабитовы хъæппæрисæй. Йæ юбилей абон бæрæг кæны телеуынынад дæр. 60 азы сты эфиры. Цæгатирыстойнаг студи фыццаг бонæй фæстæмæ сси адæмæн уарзон æмæ зæрдæмæдзæугæ. Раздæры хорз традицитæ дзы дарддæр хæццæ кæнынц абон дæр. Тематикон программæтæ. Культурæ æмæ политикæ. Фæлæ каналæн йæ артдзæст у информацион службæйы хайад. 24 сахаты, къуыри 7 боны уацхæсджытæ, шеф-редактортæ æмæ продюсертæ кусынц телевизормæкæсджытæн æвæстиатæй ахсджиагдæр хабæрттæ хъусын кæныныл. Абон телеуынынад ерыс кæны социалон хызæгтимæ. Уым алы хабар дæр базонæн ис иу уысммæ. Уымæ гæсгæ, нæ куысты сæйрагдæр у — ног уавæртæн дзуапп дæттын. Боны дæргъы 3 равдысты. Уырыссагау, иронау æмæ дыгуронау. 55 азы æххæст кæны Цæгат Кавказы телевизион кинойыл. Студи бирæ азты дæргъы уыди сæйраг. Кинонывты нымæцмæ гæсгæ йæ разæй уыди æрмæст «Лентелефильм». Паддзахадон телерадиокомпанийы æвæрæнты ис бирæ аивадон æмæ документалон кинонывтæ. Националон фондмæ бахаудысты, Цæгат Ирыстоны кинематографи, телеуынынад æмæ радиойы историйы хуыздæр цы уыд, уыдон. «Кольцо старого шейха», «По следам Карабаира», «Сюрприз» æмæ бирæ æндæр, адæмæн уарзон, кинонывтæ. Паддзахадон телерадиокомпани «Алани»-йæн ис хъæздыг истори. Æмæ стыр æнтыстдзинæдтæ. Разæй та ма сæм æнхъæлмæ кæсынц ног бæрзæндтæ. Хуасдзауты Алинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv