Алайнаг гимназы республикæйы скъолаты разамонджытæн сарæзтой æхуыртæ

Цæгат Ирыстоны ахуырады кусджыты фæлтæрддзинад бæрзонддæр кæнæн институт расидт сæрмагонд программæ. Йæ сæйраг нысан ахуыргæнджыты дæсныйад фæхуыздæр кæнын. Программæйы фæлгæты Алайнаг гимназы сарæзтой гом уроктæ. Архайдтой дзы республикæйы районты скъолаты разамонджытæ. Уыдонæн фадат уыд гимназ цавæр программæтæм гæсгæ кусы, уый бахынцын. Уыимæ ма ахуыргæнæндæтты минæвæрттæ федтой скъоладзаутæн цавæр гæнæнтæ ис уый дæр. Ахуырадон семинар цымыдисаг рауад æви нæ ? Уый базыдта не сфæлдыстадон къорд дæр. Ацы урок хуымæтæг нæу. Ног æрмæг сывæллæттæн æмбарын кæнынц математикæйы æмæ англисаг æвзаджы ахуыргæнджытæ иумæ. Цæмæй сабитæн цымыдисаг уа, уый тыххæй сын урок сарæзтой афтæ, цыма Англимæ абалц кодтой. Ацы гом урочы сты Дзæуджыхъæуы æмæ республикæйы районты скъолаты директортæ. Алайнаг Гимназы сын сарæзтой сæрмагонд семинар. 39 разамонæджы сæхи цæстæй федтой, гимназ цавæр программæтæм гæсгæ кусы, уый. Уыдысты алыхуызон урокты: математикæйы, литературæйы, алфамбылайы дунейы. Федтой, уæлæмхасæн ахуырадмæ цы цæстæнгас ис гимназы, уый дæр. Ам сывæллæттæн фадат ис архайын футболæй æмæ шахмæттæй. Уæдæ сæ кафын дæр ахуыр кæнынц. Уазджытæ куыд фæнысан кодтой, афтæмæй гимназ у дæнцæгæн хæссинаг. Алайнаг гимназы ахæм уазджытæй разы сты. Скъолайы директор Цæразонты Мæдинæ куыд зæгъы, афтæмæй ахæм семинартæ ахуыргæнджытæн сты пайда. Сæ зæрды ис дарддæр дæр сæ аразын. Æмгуыст кæнындзысты Ахуырады кусджыты фæлтæрддзинад бæрзонддæр кæныны институтимæ. Ацы семинар у ахуыргæнджытæн сæ дæсныйад фылдæр кæныны мадзæлтты фыццаг къæпхæн. Курсытæ саразынц æртæ азы иу хатт. Сæ архайджытæ кæрæдзийæн сæ дæсныйады сусæгдзинæдтæ æргом кæнынц. Курсыты фæлгæты ма саразынц лекцитæ дæр. Гагкайты Галинæ, фæлтæрддзинад бæрзонддæр Институты хайады разамонæг: «Нæ программæ æххæстгæнгæйæ мах æрбахонæм фæлтæрдджын лекторты Уæрæсейы алы регионтæй æмæ ахуырадон центртæй. Æрæджы нæм уыдысты лектортæ Волгоградæй, æмæ Мæскуыйы облæстæй, бакастысты сæрмагонд лекцитæ». Фæлтæрддзинад бæрзонддæр кæныны курсытæ нырма сты сæ тæмæны. Цæудзысты цалдæр къуырийы. Уыцы рæстæгмæ скъолаты разамонджытæ байхъусдзысты лекцитæм. Программæмæ гæсгæ, бабæрæг кæндзысты Дзæуджыхъæуы 11 -æм скъола æмæ сывæллæтты технопаркт "Кванториум" дæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv