Адæмы удæнцойæн

Æвæццæгæн, дондзæуæн хæтæлты цалцæгæн республикæйы бирæвæрсыг лæггæдты центртæн сæ бон исты куы уаид, уæд сыл сæхи нæ атигъ кæниккой. Уæвгæ сæ бæрны цы хъуыддæгтæ ис, уыдон дæр адæмæн дзæвгар фæхуыздæр кæнынц сæ уавæр. Уыцы хорзæхæй æнтыстыджынæй пайда кæнынц Уæллаг Фыййагдоны. Бахъуаджы сахат адæмæн ацæттæ кæнынц, паддзахадæй сæ цы гæххæтт бахъæуы, уый. Бирæвæрсыг лæггæдты центртæ сæ куыст райдыдтой Дзæуджыхъæуæй, фæстæдæр ныххæццæ сты районтæм. Ныр та суанг хæхбæсты æрбынат кодтой. Нæ уацхæссæг Хуасдзауты Алинæ дзы иу бабæрæг кодта. Табуафси, йе `рмæг - Куырттаты комæй. Джерапты Заремæ бирæвæрсыг центрмæ æрбацыд фæсарæйнаг паспорт райсынмæ. Куыд зæгъы, афтæмæй сын сæ уыцы лæггадæй никуы спайда кодта. Фæлæ йæ куыд бафиппайдта, афтæмæй центртæ тынг удæнцой сты. Исбонады гæххæттытæ, кадастрон паспорт, хæдтулгæ тæрынæн бардæттæг æвдисæндар саразын. Кæд раздæр уыцы паддзахадон лæггæдтæ райсынæн адæмы боны дæргъы алыхуызон кусæндæттыл зилын хъуыдис, уæд ныр сæ бон у уыцы-иу ранмæ бадæттын сæ курдиæттæ. Фыййагдоны бирæвæрсыг центры хайад байгом 2017-æм азы. Кусы бæлвырд фæткмæ гæсгæ. Къуыри сæм иу хатт ссæууынц Алагиры районы бирæвæрсыг центры кусджытæ дæр. Бирæвæрсыг центры хайæдтæ нæ республикæйы алы районты дæр кæй фæзындысты, уый руаджы адæмы рады лæууын нал хъæуы. Байгом сæ кодтой Уæрæсейы президенты майы указтæм гæсгæ. Кусæндæтты архайды бæрæггæнтыл дзургæйæ, нæ республикæ бахауд Уæрæсейы хуыздæрты номхыгъдмæ. Лæггæдты хæрзхъæддзинадмæ зæрдæ не `хсайы. Икъаты Георгий, РЦИ-Аланийы бирæвæрсыг центры директор: «2017-æм азы кæронмæ президенты майы указ сæххæст кодтам 90 проценты. Ныридæгæн та йæ æнæхъæнæй сæххæст кодтам. Фембæлдыстæм хъæуты æмæ районты хицæуттимæ, иумæйагæй архайдтам, цæмæй адæм пайда кæнын райдайой хайæдты лæггæдтæй. Сты канд Дзæуджыхъæуы нæ, фæлæ районты дæр. Битарты Вячеславы хæслæвæрдмæ гæсгæ сентябры, нæ республикæйы хъæуты æнтыстджынæй кусын райдыдтам. 1000 фылдæр цæрджытæ кæм ис, уым. Ныртæккæ нæ республикæйы ис 211 хайады. Уырдæм хауынц Дзæуджыхъæуы хайæдтæ дæр». Центры кусджытæ архайынц, сæ хайæдтæй чи кæм ис æмæ дзы цавæр лæггæдтæ райсæн ис, уый адæмæн базонын кæныныл. Сæ куысты фæтк æмæ лæггæдты номхыгъд фенæн ис центры сайты дæр. Икъаты Георгий куыд фæбæрæг кодта, афтæмæй фидæны архайдзысты сæ куысты хæрзхъæддзинад хуыздæр кæныныл. Центрты куысты фæзындзæн ивддзинæдтæ дæр. Фæлæ сæ хæс баззайдзæн уыцы иуæй: адæмы къух рогдæр кæнын паддзахадон лæггæдтæ райсыны тыххæй. Хуасдзауты Алинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv