Киноныв «Фатимæ» бæрæг кæны йæ 60 азы юбилей

Æвæццæггæн Ирыстоны ахæм адæймаг нæй, киноныв «Фатимæ» уарзон кæмæн нæу. Хетæгкъаты Къостайы поэмæмæ гæсгæ ист кинонывыл ацы аз сæххæст 60 азы. Юбилейы фæдыл ирон театры уыд бæрæгбон. Кадджын мадзалмæ ссыд киноныв «Фатимæ»-йы сæйраг хъайар Тамара Кокова. Ирыстоны мыл куыд сæмбæлынц, афтæ никуы, зæгъы Тамара Кокова. Киноныв «Фатимæ»-йы сæйраг хъайтар цин кæны, Цæгат Ирыстонмæ ссæуын ын кæй бантыст, ууыл. Кинонывыл ацы аз æххæст 60 азы. Тамара Кокова, ныр дæр ма æрхъуыды кæны кино куы истой, уыцы рæстæг. Æппæты æхсызгондæр ын у уый, киноныв æцæгæйдæр адæмон кæй сси. Фатимæйы роль Тамара Коковайæн уыд йæ дипломон куыст. Ахуыр кодта ГИТИСы. Кинонывы ахъазыны тыххæй, йæ ахуырæй йæ бон уыжд фæхауын. Уымæн æмæ уæд ахуырмæ домæнтæ уыдысты карздæр, æрыгон актертæн нæ уыд сæ бон кинонывты архайын. Фæлæ Тамарæйæн кинойы йæ куыст хорз рауад. Скодтой йын æмбæлгæ аргъ. Йæхæдæг куыд зæгъ, афтæмæй йын æппæты ахсджиагдæр уыд Фатимæйы миддуне бамбарын. Киноныв сисыны хъуыды фæзынд ирыстойнаг режиссер Уалыты Владимирмæ. Исгæ та йæ кодта студи «Грузия-фильм». Кинойыл кусгæйæ æппындæр ницæмæй тыхст, зæгъы артисткæ.  Æвæццæгæн уымæн, æмæ архайдта ахæм курдиатджын актертимæ, куыд Тæбæхсæуты Бало, Гиули Чохонелидзе æмæ Отар Мегвинтухуцеси. Киноныв Фатимæйы юбилей сбæрæг кодтой Ирон театры. Сарæзтой цымыдисаг мадзал. Бæрæгбонмæ æрбацыд бирæ адæм. Алкæмæн дæр дзы Фатимæ йæ зæрдæйы ныуагъта арф фæд. Уазджыты хсæн уыдис ахæмтæ дæр, киноныв иу æмæ дыууæ хатты чи нæ федта. Фæлæ алы хатт сæ æнкъарæнтæ вæййынц æгæрон. Нæ республикæйы сæргълæууæг Битарты Вячеславы уынаффæмæ гæсгæ Тамара Коковайæн саккаг кодтой Цæгат Ирыстоны адæмон артисткæйы ном. Бæрæгбоны архайджытæн уыцы хабар уыд уæлдай æхсызгон. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv