Худинаг æмæ алайнаг!

Цæгат Ирыстоны хъæбатыртæ сæхи Фыдыбæстæйы Стыр Хæсты куыд æвзыгъдæй равдыстой, уый айхъуыст æнæнхъæн дунейыл. Æрымысгæ дæр сæ нæ вæййы, уæдæ куыд. Нæ чысыл республикæйы, 72 адæймаджы Советон Цæдисы хъæбатыры ном хæссынц. Сæ иу у - инæлар-булкъон Мамсыраты Хаджумар. Сæрыстыр дзы куыннæ хъуамæ уæм? Хъыгагæн, бæрзæндты йæ систам æрмæстдæр ныхæстæй, фæлæ хъуыддæгтæй та ницы æвдисæм. Цы хæдзары схъомыл, уый быронæй нал зыны. Нæ уацхæсджытæ - уымæн æвдисæн. Диссагæн дзуринæгтимæ `раздæхтысты. Ольгинскæйы Кировы номыл уынгыл иу чысыл къулдзаст хæдзар уайтагъд уынгæ дæр нæ фæкæндзынæ. Дæсгæйттæ дзы ис ахæмтæ. Æрмæст кæй кой кæнæм, ууыл мемориалон фæйнæг цæст ацахсы. Йæ фыстмæ гæсгæ ацы хæдзары райгуырд Советон Цæдисы хъæбатыр, инæлар-булкъон Мамсыраты Хаджумар. Фæлæ хæдзарæн йæ къæсæры уавæрæй дæр зæрдæ ныккæрзы. Суанг дзы бынæттон цæрджытæ дæр искæй цур къæмдзыстыг кæнынц. Кæртмæ бахизын зын нæу, гъе быруйы сæрты бахиз, гъе та кулдуары сæрты багæпп кæн. Фæлæ хæдзары мидæгæй адæймаг сагъдау аззайы: уæттæ бырондонæй ницæмæй хицæн кæнынц. Исдугмæ фæдызæрдыг вæййынц, кæд, мыййаг, Мамсыраты Хъаджумармæ ницы бар дары ацы хæдзар, зæгъгæ. Дзгойты Олег дæр райгуырд æмæ схъомыл ацы уынджы. Лæппуйыл рацыд 25 азы, фæлæ хæдзар æфснайдæй федта иунæг хатт - Мамсыраты Хаджумары 100 азы юбилеймæ. Йæхæдæг йе `мбæлттимæ ацы худинаджы хабар фæндырты бæргæ цæгъды, фæлæ ницы... Фыстой сæм дунейы алы кæрæттæй, уыцы хæдзары кæртæй ма нын иучысыл сыджыт рарвитут, зæгъгæ. Уæдæ йæм делегацитæ дæр бирæ фæцыд. Фæлæ-иу адæмæй ольгинскæйæгтæ фефсæрмы сты. Фыдыбæстæмæ уарзондзинад æмæ уæлахизæй сæрыстыр æнкъарæнтæ адæмы быроны бын фесты. Фæсарæнты нæ номдзыд æмзæххонæн цыртдзæвæнтæ æвæрынц, йæ райгуырæн хъæуы та йæ хæдзар равдисынмæ нæ бæззы. Хуыцау бахизæд ардæм искæй æрбакæнынæй. Дыууæ чысыл уаты цыхуызæн уыдысты, уый зын раиртасæн у. Смагæй сæм бацæуæн нæй. Кæддæр ма дзы инæлары дзаумæттæ æмæ хуызистытæй цыдæртæ уыдис, ныр сæ аргæ дæр нал скæндзынæ. Хæдзар кæд æркæлдзæн æмæ йæ пырхыты бын Мамсыраты Хаджумары тыххæй фæстаг æвдисæнтæ кæд баныгæндзæн, уый бæрæг нæу. Хъæуы администрацийы бон, зæгъынц, ницы у. нæ тыхтæ, дам, хæдзармæ базилыны фаг не сты. Ахæм бар сæм нæй. Республикæйы культурæйы министрад æмæ Национ музейы разамындырдыгæй дæр ницыма хъуысы. Афтæмæй Мамсыры-фырты хæдзар сæ бæрны ис. Хъæуы цæрджытæ дзы стыр гуыппытæ н` агурынц, æрмæстдæр æм иучысыл базилæнт, цæмæй бынтон нæ истори ма аивгъуыйа рæстæджы цыдимæ. Дзуапдæттæг уагдæттæ немæ сæмбæлыныл æмæ сæ хъуыдытæ зæгъыныл не сразы сты. Ольгинскæйæгтæ дæр уæдæ ахæм ахастыл сахуыр сты. Разы йемæ не сты, æндæр... 9-æм майы, дам, нæм-иу фæзынут. Кæд уæд исты базмæлид. Нырмæ та уал Мамсыраты Хаджумары, Советон Цæдисы хъæбатыры хæдзары уындæй сæрымагъз цæвы уыцы-иу хъуыды - цæмæй райдайы фыдыбæстæмæ æцæг уарзондзинад? _ Мы рядом в: vk.com/irystontv instagram.com/irystontv youtube.com/irystontv twitter.com/irystontv