Цæгат Ирыстоны фæндæгты цалцæгæн радих кæндзысты 732 милуан сомы

Цæгат Ирыстоны разамынд ацы аз фæндæгты арæзтадыл бахардз кæндзæн 732 милуан соммæ `ввахс. Уыцы хъæппæрис равдисдзысты «Æдас æмæ хæрзхъæд автомобилон фæндæгтæ», зæгъгæ, национ проекты фæлгæты. Уый тыххæй информацион агентад ТАСС-æн фехъусын кодтой республикæйы Сæргълæууæг æмæ Хицауады пресс-службæйæ. Амынд фæрæзты бæрцæй хъуамæ базилой фæндæгты 40 километрмæ. Зæгъын хъæуы уый, æмæ цалцæджы куыстытæн федералон æвæрæнтæй радих кæндзысты 537 милуаны æмæ 500 мин сомы. Республикæйы къазнайæ та сын бахъæудзæн 195 милуан сомы. Фæндæгтыл бæлвырддæрæй дзургæйæ, бафиппайын хъæуы уый, æмæ зынгæ хуыздæр уавæры уыдзысты Дзæуджыхъæуы 33 æмæ `рдæг километры. Республикон нысаниуæг кæмæн ис, уыдонæй та базилдзысты 7 километрмæ. Уæззау техникæйы гуыв-гуыв рæхджы хъуамæ райхъуыса нæ республикæйы сæйраг горæты 25 уынгæй. Агентадæн ма Цæгат Ирыстоны фæндæгты хæдзарады комитеты куыд фехъусын кодтой, афтæмæй цалцæджы куыстытæ цæудзысты Дзæуджыхъæу, Рахизфарсы æмæ Горæтгæрон районты. Бафтаудзыстæм ма уый, æмæ амынд национ проектмæ хауынц 104 горæты Уæрæсейы 83 субъектæй. 2024-æм азмæ регионалон нысаниуæгимæ фæндæгты 51 процентмæ `ввахс хъуамæ дзыхъхъынногæй рацаразой. Фæндаггон бæллæхтæ арæхдæр кæм цæуынц, уыдон дæр хъуамæ фæуой 2 хатты къаддæр. Уæдæ егъаудæр горæтты кæмæ базылдысты, уыцы фæндæгты бæрц та проекты фæлгæты хъуамæ схæццæ уа 85 процентмæ. Æгæр тынг змæлд цы фæндæгтыл ис, уыдоны нымæц та хъуамæ фæкъаддæр уа 10 проценты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv