Словакийæ уазджытæ

Словакаг фæсивæдон командæ грекъаг-ромаг хъæбысхæстæй тренировкæтæ кæны Дзæуджыхъæуы спортивон залы. Республикæмæ ссыдысты 4 спорстмены. Кæстæрыл цæуы 22 азы, хистæрыл – 25. Дыууæ къуырийы Дзæуджыхъæуы тренировкæтæ кодтой ирыстойнаг богæлттимæ æмæ тренертимæ. Словакаг иугонд командæйы сæйраг тренер Леош Дремуа куыд зæгъы, афтæмæй йæ хъомылгæнинæгтимæ Цæгат Ирыстонмæ фыццаг хатт ссыд. Фæнды сæ ирон хъæбысхæсты скъолайы фæлтæрддзинадимæ базонгæ уæвын. Словакийы сæйраг тренер грекъаг-ромаг хъæбысхæстæй Леош Дремуа: «Æрцыдыстæм 16-æм сентябры, æппæт командæ мемæ нæ раластон, æрмæстдæр цыппар адæймаджы. Уыдонæй æртæйæ сты Словакийы фæсивæдон иугонд командæйы богæлттæ, иу та хæцы хистæр кары спортсментимæ. Нæ фæлтæрддзинад фæхуыздæр кæнынæн ацы балц у хорз фадат. Дзæуджыхъæуы тренировкæтæ кæндзысты 30-æм сентябры онг». Словакаг богæлтты цæттæ кодтой цалдæр къæпхæнмæ гæсгæ. Бон сын уыд дыууæ тренировкæйы. Равдыстой сын Цæгат Ирыстоны рæсугъддæр бынæттæ. Уыдысты Куырттаты комы. Сæ зæрдæмæ дзы тынг фæцыд. Спортсменты ныхæстæм гæсгæ, хъæбысхæсты ирон скъолайы спортсменмæ сæрмагонд цæстдард кæй ис. Дунеон ерыстæм бацæттæ кæнынæн ам райстой хъæугæ фæлтæрддзинад æмæ зонындзинæдтæ. Уæ зæрдыл уын æрлæууын кæндзыстæм цæгатирыстойнаг богæлттæ ацы аз рамбылдтой дыууæ сызгъæрин майданы. Ерыстæ цыдысты Мæскуыйы облæсты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv