Фæстауæрцгæнæг поликлиникæ

Медицинон æххуысы лæггæдтæ тагъддæр æмæ æнцондæр кæнынц. Дзæуджыхъæуы дыккæгæм поликлиникæ цалцæг кæнынц федералон программæмæ гæсгæ. Ифтонг æй кæнынц ног кусæнгæрзтæй. Фыццаджыдæр, бацæттæ кодтой регистрацитæгæнæн бынæттæ. Ныр рынчынты рады лæууын нал хъæудзæн æмæ пациенттæ медицинон æххуыс тагъддæр исдзысты. Дохтырмæ бахауын ис цалдæр хуызы: паддзахадон лæггæдты порталы хи рады ныффысгæйæ, поликлиникæйы терминалы, кæнæ та æнæниздзинад хъахъхъæнынады министрады телефонтæм бадзургæйæ. Æппæт информаци фыст æрцæуы картæйы: пациенты ном, цавæр дохтырмæ цафон йæхи ныффыссын кодта, уый æмæ æндæр информаци. Уымæй уæлдай ма поликлиникæмæ æрбацæуджыты адих кодтой рынчын æмæ æнæниз, фæлæ дохтырты консультаци кæй хъæуы, ахæм къордтыл. Дохтырты ныхæстæм гæсгæ, ахæм ногдзинад сын сæ куыст бирæ фæрогдæр кæндзæн. Уымæй уæлдай ма поликлиникæйы сарæзтой сывæллæттæн чысыл ирхæфсæн уат. Сæрмагонд бынат ис гыццыл сывæллæттæ æмæ ноггуырдтæ кæмæн ис, уыцы мадæлтæн. Аивгонд æрцыд поликлиникæмæ бацæуæн дæр. Кæрты та фæзынд сывæллæтты коляскæтæн бынат. Зæгъын ма хъæуы уый æмæ федералон программæмæ бахастой горæты æппæт поликлиникæтæ. Афæдзы кæронмæ та ма сыл бафтаудзысты районты æнæниздзинад хъахъхъæнынады уагдæттæ дæр. Программæйы сæйраг хæс у адæмы социалон уавæртæ фæхуыздæр кæнын æмæ медицинон лæггæдты хæрзхъæддзинад фæхуыздæр кæнын. Æнæниздзинад хъахъхъæнынады министрады зæрдæ æвæрынц, ацы мадзæлттыл дарддæр дæр æнтыстджын куыст кæй цæудзæн, уымæй. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv