Цæгат Ирыстоны арæзтад æмæ архитектурæйы министры хæстæ рæстæгмæ æххæстгæнæгæй снысан кодтой Атараты Георгийы. Уый фехъусын кодтой абон хицауады радон аппаратон æмбырды. Сергей Меняйло бабар кодта ведомствойы раздæры разамонæг Моргуаты Константинæн, йæ бынаты йæ чи раивта, уымæн йæ куысты хъуыддæгтæ бамбарын кæнын. Уымæй уæлдай ма æмбырды ныхас кодтой, ахуырады къабазы кусджытæ кæй нæ фаг кæны, ууыл. Алыбегты Эллæ куыд фæбæрæг кодта, афтæмæй уыцы фарста иуварс кæнын хъæуы къæпхæнгай. Регионы сарæзтой педагогон кусджытæн уæгъд бынæтты армукъа. Ахуыргæнæндæтты директортæ дзы равæрдтой сæ курдиаттæ. Профилон министры ныхæстæм гæсгæ, æрыгон ахуыргæнджыты мызд фылдæр кæндзысты грантты 'руаджы. Фембæлды ма æркастысты æхсыр, нозт æмæ сæкæрхæццæ продукцийыл нысантæ æвæрыны фарстамæ дæр. Республикæйы экономикон рæзты министр Кучиты Зауыр куыд радзырдта, афтæмæй бæгæны фыцджытæ ныридæгæн иууылдæр срегистраци кодтой системæ "Честный знак"-ы. Уæлдай цæстæнгас Цæгат Ирыстоны разамонæг аздæхта, Архонская станицæмæ дон куыд хæццæ кæны, уыцы фарстамæ. Сергей Меняйло куыд бафиппайдта, афтæмæй ахæм хъуыддаджы къуырийы райдианмæ æнхъæлмæ кæсын нæ хъæуы, фæлæ, гæнæн куыд ис, афтæ тагъд фарста аиуварс кæнын.