Цъинагары цæрджытæй гуырдзиаг националисты амæттаг чи бацис, уыдоны æрымысыдысты

Уымæй раздæр та ма Хуссар Ирыстоны мысыдысты æндæр фыдбæллæхы амæттæгты нæмттæ. Афтæ рауад республикæйы хъысмæт æмæ Хуымгæнæны мæй зæрдæриссæн цаутæй æххæст у. Диссаг у, фæлæ цы бæллæхы кой кæндзыстæм, уый дæр æрцыд зæххæнкъуысты азы. Æрмæст дыууæ боны раздæр. Уæд гуырдзиаг националисттæ сысытадысты Цъинагары цæрджыты ныхмæ. Хъæуы цæрджытæй амардтой авды. Ивгъуыд къуырийы кæрон сын сæ нæмттæ æрхъуыды кодтой сæ райгуырæн хъæуы. Уыцы боны цаутæ раст цыма æрæджы æрцыдысты, афтæ лæууынц адæмы зæрдыл. Хъæугæрон йæ фос цы фыййау хызта, уый хъæумæ фæфæдис, мæ рæгъау мын гуырдзиаг хъæуырдæм фæтæрынц, зæгъгæ. Цалдæр æвзыгъд ирон лæппуйы атындзыдтой уыцы фыдракæнды ныхмæ сыстынмæ. Фæлæ сын адзалы фæндаг рауад. Гуырдзиаг фыдгæнджытæ дзы авды æгъатырæй амардтой. Сæ мадæлтæ уæдæй фæстæмæ сæ саутæ исгæ дæр нал скодтой, сæ зæрдæйы рис дæр нал байсыст. Æнхъæлмæ гæсгæйæ сæм сæ бонтæ `рвитынц. Бæргæ, уыцы бонæй фæстæмæ гуырдзиаг фыдгæнджытæ сæ кæнон куы ныууагътаиккой. Фæлæ куыннæ стæй! Нæ ауæрстой адæмыл, цуан сын кодтой сæ исбоныл. Уæдæй фæстæмæ хъæуы цæрджытæн 28 апрель ссис номарæг бон. Кадджын мадзалмæ сæмбæлдысты Хуссар Ирыстоны разамынды минæвæрттæ, лæппуты хæстæджытæ, зонгæтæ, æмхъæуккæгтæ, сколадзаутæ. Лæппуты нæмттæ сæ кæй никуы ферох уыдзысты, уымæй кæрæдзийæн дзырд раттынц. Хуссар Ирыстоны истори йæ хъуырмæ у саударæн бонтæй. Сабыр цардмæ тырнæг адæмы чи къуыхтæ кæны, уыдоны фыдмитæ рох никуы уыдзысты - ахæм уыд йæ раныхасы хъуыды республикæйы президент Бибылты Анатолийæн дæр. Афтæ рауад, æмæ Цъинагары хæстон цаутæ комкоммæ нæ цыдысты. Фæлæ дзы чи фæмард æмæ æбæрæгæй чи фесæфт, уыдон баисты 23. Хæст сыл йæ тугæйдзаг къух уæддæр æруагъта. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv