Елхоты байгом спортивон комплекс

Æнæниз цардыуаг кæны парахатдæр. Абон Елхоты кадджын уавæры байгом ног спортивон комплекс. Арæзт æрцыд федералон программæмæ гæсгæ. Районы бæрæгбонмæ сæмбæлд Битарты Вячеслав дæр. Спортивон комплексы фæзуат у 2700 квадратон метры. Адæмы цинæн кæрон нал уыди, уымæн æмæ ацы хъуыддагмæ рагæй æнхъæлмæ кастысты. Комплексы кусдзæн æртæ секцийы: уæгъдибар хъæбысхæст, дзюдо æмæ боксæй. Уыцы-иу рæстæг дзы тренировкæтæ кæнын сæ бон у 360 лæппу æмæ чызгæн. Фыццаг бон дæр залы къухбакæнæн нæй. Æрыгон спорстменты фадæттæ фæуæрæхдæр сты. Уый та уый нысан у æмæ Кировы районы дæр Олимпаг чемпионтæ кæй фæзындзæн. Цæрджытæ сæ зæрдæ дарынц, хъæуты фæсивæд æнæниз æмæ тыхджын кæй уыдзысты, ууыл. Битарты Вячеслав: «Стыр арфæ уын кæнын, абон ам кæй æрбалæууыдыстут уый тыххæй. Абон Елхоты Кировы районы ис хорз хъуыддаг, гом кæнæм ног галуан. Дарддæр дæр куыст цæудзæни цæмæй уыцы галуантæ, уыцы хъуыддæгтæ фылдæр кæной ам Кировы районы, Елхоты хъæуы. Æппæт республикæйы дæр цæуы ахæм хъуыддæгтæ, гом кæнæм культурæйы галуантæ, спорты галуантæ æмæ афæдз кæрон уыдзæн ма ноджы цалдæр ахæм хъуыддаджы. Уый у районы хицауады руаджы, кусджыты фæрцы æмæ уе ппæтæн дæр стыр бузныг зæгъын. Дарддæр дæр нæ иумæ кусын хъæуы, цæмæй ацы къуылымпыдзинæдтæ сраст кæнæм æмæ дарддæр кусæм, уый». _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv