Дзæуджыхъæуы райдыдтой Плиты Иссæйы номыл ерыстæ дзюдойæ

Таймазты Мæдинæйы фæзмынц æрыгон фæсивæд дæр. Дзæуджыхъæуы райдыдтой 18 азы онг чызджытæ æмæ лæпуты 'хсæн æппæтуæрæсеон ерыстæ дзюдойæ. Ссардтой сæ Советон Цæдисы дыууæ хатты хъæбатыр æмæ Монголы адæмон республикæйы хъæбатыр Плиты Иссæйы ном. Турнир сарæзтой ныр 5-æм хатт. Ахæм хъæппæрис разынд Плиты мыггагмæ, сæ фарсмæ æрбалæууыдысты Спорты министрады уæнгтæ. Ерысты архайынц бæстæйы алы субъектты минæвæрттæ. Уыдон сты 2007-æм, 2008-æм æмæ 2009-æм азты гуырд 250 лæппу æмæ чызджы, хæцынц 46-æй 90 килограммы онг уæзы категориты. Мадзаларазджытæ куыд фæбæрæг кодтой, афтæмæй турнирмæ азæй-азмæ фылдæр фæсивæд здахынц се 'ргом.