Мариинаг театры Цæгат Ирыстойнаг филиалы симфонион оркестр сæхгæдта радон сезон

Абон нæ республикæйы аивадуарзджытæн сæ зæрдæтæ барухс сты Мариинаг театры Цæгат Ирыстойнаг филиалы симфонион оркестры ацы сезоны фæстаг концертæй. Арæзт æрцыд паддзахадон филармонийы. Галуаны къух бакæнæн нал уыд. Аивадон изæры азæлыдысты романтизмы фæстаг æнусы композитор, немыцаг экспрессионизмы ирддæр минæвар - Рихард Штраусы уацмыстæ. Се 'хсæн - гобой концерт оркестримæ, симфонион поэмæ «Смерть и просветление» æмæ сопранойæн оркестримæ фыст «Цыппар фæстаг зарæджы». Концерт амыдта Цæгат Ирыстоны сгуыхт артист, дирижер Гугкаты Зауырбег. Равдысты солисттæ та уыдысты дыууæйæ. Гобойыл цагъта Вячеслав Карташёв. Заргæ та концерты дыккаг хайы акодта æппæтадæмон æркастыты лауреат, Мариинаг театры æрыгон оперон зарæггæнджыты академийы солисткæ Мария Баянкина. Ирон аивадуарзджытæ йæ хорз зонынц. Сарæзтæ æвæджиауы сурæттæ оперæтæ «Тамара и Давид Сослан», «Агриппина», «Евгений Онегин» æмæ «Аида»-йы. Мария Баянкина у уарзон зарæггæнæг ирон адæмæн. Иу æмæ дыууæ хатты нæ архайдта нæ республикæйы концертты. Уæдæ йæ адæм фестивальтæ «В гостях у Ларисы Гергиевой» æмæ «Мариинский - Владикавказ»-æй дæр хорз бахъуыды кодтой. Солисткæйы ныхæстæм гæсгæ, ацы концертон сезон Цæгат Ирыстоны рауад тынг æнтыстджын æмæ зæрдæмæдзæугæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv