Фылдæр æмæ хуыздæр

Республикæйы экономикон рæзтыл ныхас бирæ цæуы. Раст зæгъгæйæ, хуыздæрырдæм ивддзинæдтæ дæр ис. Фæлæ уæддæр исты ног æнтыстджын куыстуаты кой фехъусын алкæддæр æхсызгон вæййы. Абон цы заводы кой ракæндзыстæм, уым уал 130 адæймаджы кусы. Кæд сæ къухы бафта продукцийы хуызтæн ног кусæнгæрзтæ балхæнын, уæд кусджыты нымæц дæр фæфылдæр уыдзæн. Уæдма уал завод æххст кæны æппæт фиддонтæ æмæ хъалонтæ, афтæ экологон домæнтæ дæр. Заводы зæрдæ æмæ йæ сæйраг дадзин у разамынд дæттæн центр.  Ам пайда кæнынц шведаг нырыккон кусæнгæрзтæй. Специалисттæ агъуысты стыр рудзгуытæй сæ цæст дарынц, технологитæ куыд æххæстгонд цæуынц, уымæ. Заводы уæйгæнæн хайады хицау Дзуццаты Геннадий: «Змискъахæнтæй æрзæт æмæ змис цæуы æмбырдгæнæнтæм. Технологон домæнтæм гæсгæ уырдыгæй цæуы дурыссæн куыроймæ, хомаг дзы адих кæнынц ставд æмæ лыстæгыл продукцийыл. Афтæмæй радих кæнынц хуыры 5 хуызы, змисы 2 хуызы – æхсад æмæ мургæнæнтæй змис». Заводы продукцийæ пайда кæнынц Зæрæмæджы ГЭСы арæзтады æмæ доны былгæрæттæ фидаргæнæн куыстыты. Йæ генералон директор куыд зæгъы, афтæмæй сæ продукци дзуапп дæтты нырыккон домæнтæн. Уымæ гæсгæ йын æндæр регионты дæр æлхæнджытæ ис. Сæ бетон æрвитынц Мæскуы, Белгород, Ростов, Астрахан æмæ Волгоградмæ. Æнæххæстбарджын æхсæнад «Прогресс»-ы генералон директор Султан Рахмаев: «Ныртæккæ заводы кусы 130 адæймаджы. Уыдон цехы æмæ техникон кусджытæ дæр сты, технологтæ, алыхуызон æххуыс чи кæны, ахæмтæ. Нæ зæрды ма ис бетоны æндæр хуыз уадзын æмæ бетонæй дуртæ кæнын. Уæд ма нæм ноджы 20 бынаты фæзындзæн». Завод «Прогресс»-ы бетон продукци, бæлвырддæр зæгъгæйæ та, бетон цæджындзтæ уаддзысты 100 мины. Заводы разамынд фæнд кæны 450 000 евройы аргъ сæрмагонд кусæнгæрзтæ балхæнын. Уæд ма куыстуат экологийæн дæр зиан нæ хæсдзæн. Дывæр пайда. Заводы алыварс та фæзуæттæ скæндзысты, раздæр куыд уыдысты, афтæ. Ныридæгæн уал райдыдтой зæххы уæлцъар сног кæныны мадзæлттæ æххæст кæнын. Рагагъоммæйы бæрæггæнæнтæм гæсгæ, ацы аз куыстуаты `фтиæгтæ милуан æмæ 500 мин сомы уыдзысты. Уый республикæйы бюджетыл хуыздæрырдæм фæзындзæн. Раппæлинаг ма у уый дæр, æмæ завод фиддонтæй йæхи не `мбæхсы æмæ цыфæнды хъалон дæр афоныл фиды. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv