Аланийы аргъуыды 1100 азы юбилейы бæрæгбонмæ Цæгат Ирыстонæн рахай кæндзысты 190 милуан сомы

Æхцайы фæрæзтæ куыд хардзгонд цæудзысты, ууыл ныхас кодтой сæрмагонд æмбырды. Рахай сæ кæндзысты 2020-æм азы. Бакусдзысты, культурон нысаниуæг кæмæн ис, уыцы объекттыл. Республикæйы сæргълæууæг Битарты Вячеслав Хицауады сæрдары хæдивæг Азымты Иринæйæн бахæс кодта, уыцы хъуыддагмæ æркæсын. Хъуамæ сбæлвырд уой, реставраци чи кæндзæн, уыцы куыстуæттæ. Ныридæгæн бацæттæ кодтой бæрæгбоны мадзæлтты сæйрмагонд программæйы проект дæр. Йæ фæлгæты сараздзысты алыхуызон цымыдисаг мадзæлттæ. Бирæ уазджытæ æрцæудзæн Ирыстонмæ, æмæ канд Уæрæсейæ нæ, фæлæ дунейы алы рæттæй дæр. Уый тыххæй æрæджы журналисттæн фехъусын кодта Дзæуджыхъæуккаг æмæ Алайнаг епархийы епископ - фыд Леонид. Дины кусджыты ныхæстæм гæсгæ, уазджытæн цы равдисой, уый сын ис. Президент куыд загъта, афтæмæй хорз уаид бæрæгбоны цæттæгæнæн мадзæлттыл куы бацархаиккой Уæрæсейы субъектты паддзахадон оргæнтæ, стæй бынæттон хиуынаффæйады оргæнтæ дæр, уæд. Ацы бæрæгбоны аразджыты хъæппæрисы фæрцы 2020 адæм фендзысты æппæтадæмон наукон конференци. Баст уыдзæн Алани æмæ Кавказы историимæ. Уыимæ æрæджы райдыдтой кусын документалон кинонывыл дæр. Фæцæудзæн зæрдæмæ куыд хистæр кары адæмæн, афтæ кæстæртæн дæр. Уыимæ бацархайдзысты «Алайнаг библиотекæ»-йыл дæр. Уыцы проектмæ бахæсдзысты наукон æмæ аивадон литературæйы актуалондæр æрмæджытæ. Проекты сæйраг нысан у - ирон культурæ æмæ традицитæ бахъахъхъæнын. Уæдæ 2022 азы та хъавынц тематикон равдыстытæ скæнын. Арæзт æрцæудзысты нæ республикæйы национ музейы. Йæ сæйраг темæ – «Аланийы аргъуыдыл - иу мин сæдæ азы». Адæмы рæгъмæ рахæсдзысты, Аланимæ чырыстон дин куыд æрбахæццæ, уыцы историон цаутæ. Уыимæ ма национ музейы сæвæрдзысты экспозици. Уæдæ ма фæнд кæнынц театралон фестиваль дæр саразын, уый дæр баст уыдзæн историон хабæрттимæ. Æвдыст æрцæудзысты, реконструкцигонд цы мигæнæнтæ æрцыдысты, уыдон дæр. Уыдонæй уæлдай æвдыст æрцæудзысты, музейтæ се 'хсæн цы равдыстытæ бацæттæ кодтой, уыдон дæр. Сæ нæмттæ: «Сокровища Аланского царства» æмæ «Алания. Истоки цивилизации», - зæгъгæ. Сæ сæйраг нысан у иумæйаг культурон æмæ аивадон зонындзинæдтæ апарахат кæнын. Аланийы чырыстон аргъуыды иу мин сæдæ азы бæрæггæнæн мадзæлтты фæлгæты реставрацигонд æрцæудзысты цалдæр культурон объекты. Уыдоны 'хсæн хъахъхъæнæн фидæрттæ æмæ мæсгуытæ. Уыдоны ’хсæн Зруджы аргъуаны бæстыхай, Уæлахизхæссæг сыгъдæг Георгийы аргъуан, Ирон æмæ Ильинаг аргъуантæ дæр. Уымæй уæлдай ма Кодзаты хъахъхъæнæн гæнах, æмæ Заманхъулы цы «Зылын цырт» ис, уый. Стæй нæ республикæйы Хетæгкаты Къостайы номыл цы музей ис, æмæ ма Къоста 1859 азы цы хæдзары райгуырд, уыдон дæр. Уæдæ спорты уарзджытæн дæр æхсызгон лæвар. Нæ республикæйы арæзт æрцæудзæн Андиаты Сосланы номыл æппæтадæмон турнир уæгъдибар хъæбысхæстæй. Æппæтуæрæсеон ерыстæ аивадон гимнастикæйæ. Беслæныхъæуы та арæзт æрцæудзысты бæхты ерыстæ. Æппæт уыцы мадзæллтæй фæстæмæ ма адæм фендзысты цымыдисаг хабар. Мыхуыры рауаддзысты посты маркæтæ æмæ юбилеон æхцатæ. Уый ууыл дзурæг у, æмæ ацы бæрæгбонмæ кадджын æмæ егъау кæй уыдзæн. Уæдæ ма нæ республикæмæ æрцæудзæн Æппæт уæрæсейы æмæ Мæскуыйы патриарх Кирилл дæр. Куыд уынут, афтæмæй, 2020-æй 2022 азмæ нæ республикæ ацы бæрæгбоны фæдыл бæстонæй бацархайдзæн. Ацы проекты программæйы мадзæлттæ цæудзысты æртæ боны. Ныры онг æппæт ацы цæттæгæнæн хъуыддæгтæ æмбæрстгонд цæуынц Паддзахады уæнгтæм. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv