Алагиры районы сцалцæг кæндзысты рынчындон

Алагиры районы рынчындон цалцæггонд æрцæудзæн бындуронæй. Уый тыххæй фехъусын кодта нæ республикæйы сæргълæууæг. Битарты Вячеслав æй бабæрæг кодта куыстадон балцы рæстæг. Ног бæстыхайы уыдзæн реанимаци, арæндон, терапийы, хирургийы æмæ сылгоймæгты низтæ дзæбæхгæнæг хайæдтæ. Куыстытыл схардз кæндзысты 43 милуан сомы. Аразджытæ сæ фæуыдзысты августы кæронмæ. Лыггæнинаг у хæцгæ низты хайадмæ базилыны фарста дæр. Йæ уавæртæ домæнтæн дзуапп рагæй нал дæттынц. Битарты Вячеславы хæслæвæрдмæ гæсгæ дзы цыбыр рæстæгмæ сараздзысты, 20 адæймагæн бынат кæм уыдзæн, ахæм бæстыхай. Куыд ма дзы радзырдтой, афтæмæй фарон рынчындонæн радтой 7 машинæйы. Уыдон лæггад кæнынц дард хъæуты цæрджытæн. Республикæйы сæргълæууæг ма сбæрæг кодта, рынчынтæ хостæй цух сты, æви нæ, уый. Ног ахуыры азы та Алагиры сабитæн уыдзæн ног рæвдауæндонмæ цæуыны фадат. Аразынц æй федералон программæмæ гæсгæ. Хъуамæ афæдзы кæрон сцæттæ уыдаид, фæлæ байгом уыдзæн æмгъуыдæй раздæр. Проекты аргъ у 112 милуан сомы. Цæудзæни йæм 120 сывæллоны. Уый фæрцы фæкъаддæр уыдзæн, Алагиры рæвдауæндæттæм рады чи лæууы, уыдоны нымæц. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv