Ирон чъиритыл бартæ æрæвæрдзысты - кæдæй уæдæй!

Уæрæсейы Федерацийы Советы дзырдтой Граждайнаг кодексмæ ног ивддзинæдтæ бахæссыны тыххæй. Валентина Матвиенко бахæс кодта географион амындзинадыл бæстонæй бакусын. Махæн ахæм ногдзинад уыдзæн уæлдай ахсджиаг. Ирон чъириты æгъдаумæ кæсгæ нал кæнынц. Ирыстонæй дæ къах куы авæрай, уæд та дзы цы нæ хуыз разындзæн, иу ахæм не ссардзынæ. Цалынмæ схæц-ныххæц кæнæм ирон чъиритыл патент сфидар кæныныл, бантысдзæн æви нæ, ууыл, уæдмæ æцæг сæ бæркад сæфтмæ цæуы. Нæ президент Владимир Путин кæддæр куыд загъта, афтæмæй ахæм хæрзад чъириты цур Макдоналдсы бургертæ рыг дæр нæ калынц. Ирон чъиритæй чи нæ акомдзаг кодта, ахæмы ссарын зын уыдзæн. Æмæ куыннæ! Æнæхъæн бæстæйыл апарахат сты. Фыцынц сæ хæдзары, кафеты, ресторанты. куыстмæ дæр сæ тæвдæй фæхæццæ кæнынц. Чи та ма сæ салдæй дæр æлхæны. Фæлæ уæ уый ма фæсайæд. Æцæг ирон чъири бирæтæ сæ цæсты кæронæй уынгæ дæр нæ фæкодтой. Ирон чъиритæ модæйы сты! Æнæхъæн дунейыл апарахат сты, зæгъгæ, уый дæр рæдыд нæу. Дисы никæй бафтаудзæн. Кæд, æрмæстдæр нæхи... Фыдджынтæ - карчы дзидзайæ, игæртæй, сæ фæстæ - зокъоджынтæ, шпинатæй цæхæраджынгæндтæ, стæй кæд уый фаг нæ уа, уæд бананджын. Цæттæ десерт! Цыма исты худæгæн дзуринæгтæ сты, уыйау. Фæлæ сыл куы ахъуыды кæнæм, уæд зæрдæ бамæгуыр вæййы. Ахæм «джынтæ» кæнынц Уæрæсейы дзулфыцæн бынæтты. Ныр та фæзынд - географион амынддзинад. Уымæ гæсгæ ирон чъиритæ хъахъхъæнинаг объектты хыгъдмæ хаст æрцæудзысты. Йæ хъæппæрис Федерацийы Советы æмбырды бахаста нæ республикæйы базарадон-экономикон фарстаты æххæстбарджын минæвар Сокаты Марат. Йæ ныхæстæм гæсгæ, ахæм ивддзинад ахъаз уыдзæн æрмæст ирон фынджы æгъдæуттæ бахъахъхъæнынæн нæ, фæлæ ма экономикæйы райрæзтæн дæр. Къухы бын цы уа, уыдонæй чъиритæ ратъæпп-тъæпп кæнын æмæ сæ стæй хъæлæсыдзагæй "ирон" чъиритæ" хонын раст нæу. Патенты хъуыды фæзынд рагæй æмæ йыл ныртæккæ бастонæй кусын кæй райдыдтой, уый хорз у Чъиритыл бартæ куы ныффидар кæнæм, уæд хъуыддаг иннæрдæм раздæхдзæн. Ирон чъириты ном хæсдзысты, æрмæстдæр Ирыстоны кæй сфыхтой, уыдон. Дарддæр сæ парахат кæнынæн, хъæудзæн бардæттæг гæххæтт райсын. Хъуыддагмæ лæмбынæг йæ хъус дардзæн республикæйы экономикон райрæзты министрад. Бахæс æй кæндзысты уыдонæн. Гогаты Марат, Александр Левченко - Ирыстоны Хабæрттæ _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv