Федералон программæйы фæлгæты дыууæ азмæ Цæгат Ирыстоны сцалцæг кæндзысты 63 скъолайы

Дзæуджыхъæуы 22-æм скъолайыл цæуы 45 азы чысыл цухæй. Бындуронæй цалцæггонд никуы уыд. Федералон программæйы фæлгæты бæстыхайæн ногæй баивдзысты йæ сæр, саив ын кæндзысты йæ æддаг бакаст, сног кæндзысты пъолтæ, хæрæндон, актон æмæ спортивон залтæ. Баххæст кæндзысты ныййарджыты курдиæттæ дæр. Фæнды сæ хæрæндоны авналæнтæ фæуæрæхдæр кæнын. Уый руаджы сывæллæтты рады лæууын нал хъæудзæн. Ахæм уавæр сæвзæрд Дзæуджыхъæуы 26-æм скъолайы дæр. Бирæ азты ам арахыйынц хи хъарутæй. Цалцæггæнæн куыстытæ дзы уæлæнгай цыдысты. Фæлæ уый фаг нæу. Зæгъæм, æддаг къулты сæрстытæ азгъæлдысты. Уымæй зæрдæ нæ райы, уæлдайдæр скъолайы кæрты бæрæгбоны мадзæлттæ куы фæцæуынц, уæд. Программæ канд рацарæзтæй нæ фæуыдзæн. Фидæны сног кæндзысты материалон-техникон бындур. Цæгат Ирыстон ис æппæты фылдæр æхцайы фæрæзтæ кæмæн рахай кодтой, уыцы фондз регионы 'хсæн. Æдæппæтæй 3 млрд 500 млн сомы. Сæйраг домæн — цалцæггæнæн куыстытæ ахуырадон процесс хъуамæ ма фæкъуылымпы кæной. Дыууæ азмæ республикæйы бындуронæй рацараздзысты 63 скъолайы. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv