Национ антитеррористон комитет куыд хъусын кæны, афтæмæй Киев абон райсомæй сарæзта теракт Хъырымы хидыл. Архайдтой дзы дыууæ æнæпилотон хæдтæхæджы. Æнæнхъæлæджы цау æрцыд хиды 145-æм цæджындзы цур Краснодары крайы 'рдыгæй. Нæ бæстæйы транспорты министрады куыд фехъусын кодтой, афтæмæй фæндаг хъыгдард баййæфта. Фæмард дзы дыууæ адæймаджы. Уыдон сты Белгороды облæсты цæрджытæ. Хъыгдард баййæфта сӕ сывæллон дæр, баластой йæ крайы рынчындонмæ. Кубаны оперативон штаб куыд хъусын кæны, афтæмæй йæ уавæр тынг уæззау нæу, йæ цардæн тæссаг ницæмæй уал у. Бынаты куыстой тагъд æххуысы службæтæ æмæ барадхъахъхъæнæн органтæ. Æфсæнвæндаггон бастдзинад тагъд скусын кодтой. Хъырымы хицауады куыд фехъусын кодтой, афтæмæй рæстæгмæ рог хæдтулгæтæ цæудзысты паромыл. Уæзласæнтæ та - ног зæххыты уылты. Хидмæ бацæуӕны цæндтæ нал ис.