Скъолайы актон зал, зæгъæн ис, æмæ æфснайд фæци. Хъæуы ма пъол ныммæрзын, рудзгуыты тарвæзты рыг ныссæрфын. Сæрдыгон каникулты рæстæг агъуыстæй нæ пайда кæнынц. Сыхаг кълас та цæттæ у, уыдзæн дзы сæйраг паддзахадон фæлварæн. Фæсивæд партæтæ æрбахастой, хъуамæ 15 уой, номыртæ сыл сæвæрдтой. Куыстытæ кæд зын не сты, уæддæр бирæ сты. Тогуызты Сæрмæт, йе 'мбæлттау, æххуыс кæны ахуыргæнджытæн. Куыд загъта, афтæмæй фæллойадон лагермæ æрбацæуын йæхи фæнд уыд. Мæй æмæ æрдæджы размæ йæ гæххæттытæ балæвæрдта куыстдæттыны центрмæ. Йæ ныййарджытæ йын йæ хъуыдыимæ сразы сты. Сæрдыгон фæллойадон лагерь 30-æм скъолайы йæ куыст райдыдта 1-æм июны. Архайынц дзы 10-æм къласы ахуыргæнинæгтæ, сты 50-ы бæрц. Фæстæдæр, фæлварæнтæ куы фæуой, уæд æрбацæудзысты 9-æм къласы ахуыргæнинæгтæ дæр. Скъоладзаутæ, бæстыхайæ уæлдай, кусынц йæ алфамблай дæр. Сæрдыгон фæллойадон лагерь ис Дзæуджыхъæуы 8 ахуырадон уагдоны. 14 азæй фылдæр кæуыл цæуы, уыцы фæсивæды бон у кусын æмæ мызд исын. Практикæ дзы цæуы 121 ахуыргæнинаджы. Æдæппæтæй сæрдыгон рæстæг куыстдæттыны комитеты руаджы куысты ныллæууыдысты Ирыстоны 1100 скъоладзауæй фылдæр. Ахæм фæлтæрддзинад сын, экспертты ныхæстæм гæсгæ, фидæны æххуыс уыдзæн: æхсæнадæн пайдахæссæг архайд, æмгæрттæ æмæ ахуыргæнджытимæ хæлар ахастдзинæдтæ.