Ног закъонтæ

Цæгат Ирыстоны кадджын цæрæджы ном радтыны тыххæй закъоны проект сфидар кодтой дыккаг æркасты республикæйы парламенты радон æмбырды. Уыцы хъæппæрис депутатты размæ бахаста Цæгат Ирыстоны сæргълæууæг. Закъонмæ гæсгæ, республикæйы кадджын цæрæджы ном кæмæн радтой, уымæн фадат уыдзæн æрвылмæй йæ пенсимæ уæлæмхасæн 5 мин сомы исынæн. Æмбырды ма ныхас кодтой республикон бюджеты дефицит сæхгæнынæн, федералон бюджетæй кредит райсыны фæдыл уæлæмхасæн бадзырдтæ бафыссыны тыххæй. 2017-æм азы республикæйы бюджетон кредиттæн сарæзтой реструктуризаци. Ома, федералон бюджетæй республикæ цы хæс дары, уый фидыны æмгъуыд ахастой 2018-æмæй – 2024-æм азтæм. Уыимæ, 2018 æмæ 2019-æм азты бафидын хъæудзæн 384 милуан сомы. 2020-æм азы та бафидын хъæудзæн 769 милуан сомы. Стæй – 1 миллиард сомæй фылдæр. Парламенты профилон комитеты уæнгтæ куыд фехъусын кодтой, афтæмæй республикæ кредитмæ гæсгæ фиды куыд æмбæлы, афтæ. Фæсивæдон парламенты скондмæ дæр бахастой ивддзинæдтæ. Æхсæнадон организацийы 12 уæнджы суæгъд кодтой сæ бынæттæ. Уæлдай цæстдард парламенты депутаттæ аздæхтой æнæниздзинад хъахъхъæныны фарстатæм. Æрдзырдтой ацы къабазы лыггæнинаг фарстатыл. Се`хсæн æппæты ахсджиагдæрыл депутаттæ нымайынц кадрон политикæ куыд æмбæлы, афтæ саразын. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv