Бæрæгбоны æртæ чъирийы хæдзары кæнæм æви дуканийы æлхæнæм?

Кæд Ирыстоны ацы бонты алчи йæхи цæттæ кæны Джеоргуыбайы бæрæгбонмæ, уæд æппын фадат кæмæн нæ вæййы, уыдон та се ’ртæ уæлибæхы дуканиты дзулфыцæн кусджытæн бабар кæнынц. Махæн не ’сфæлдыстадон къорд абон уыдис нæ горæты хæдзары кæртытæй иуы. Стæй абалц кодта дуканимæ дæр. Сбæрæг кодтой бæрæгбонмæ кувинæгтæ куыд цæттæ кæнынц, уый. Адæм кæрæдзийæн арфæйы ныхæстæ кæнынц, алчидæр йæхи рагацау райдыдта цæттæ кæнын Джеоргуыбайы бæрæгбæттæм. Фæстейы нæ базадысты Дзæуджыхъæуы Къесаты Астаны номыл уынджы цæрджытæ дæр. Уыдон абон сæумæрайсом рацыдысты кæртмæ, цæмæй иумæйагæй, куыд æмбæлы афтæ, бакой кæной кусæрттаг æмæ æрцæттæ кæной фынгтæ. Къесаты Астаны номыл 23-æм уынджы хæдзары цæрджытæ æппæт бæрæгбæттæм дæр бæстонæй фæцæттæ кæнынц. Сæхæдæг нын куыд радзырдтой, афтæмæй æрвылаз фатерты бахизæнæй цалдæр минæвары равзаврынц, радон хатт бæрæгбон чи срæсугъд кæндзæн, ахæмты. Æвзæрст адæм сæхимæ райсынц хæрдзтæ, æмæ бæрæгбон саив кæнынц. Нæлгомæгтæ кусарты кой кæнынц, сылгоймæгтæн дæр ис сæхи хæс. Уыдон абон хъуамæ срæсугъд кæной бæрæгбоны фынгтæ. Ацы хæдзары цæрынц «Иры Стыр Ныхас»-ы уæнгтæ дæр. Уыдоны фæрцы дæр ацы хæдзары арæзт цæуынц бирæ цымыдисаг ерыстæ, конкурстæ æмæ мадзæлттæ. Фæнды сæ, цæмæй фæсивæд сцыбæл уой æнæниз царды уагмæ, æмæ ма уыимæ зонгæ кæной бæрæгбæтты сусæгдзинæдтимæ. Кæд бирæтæ бæрæгбонмæ сæхи хæдзæртты цæттæ кодтой, уæд æнæвдæлон чи разынд, уыцы адæм та бавдæлыдысты, æмæ сæ æртæ уæлибæхы бабар кодтой скæнын дуканиты дзулфыцджытæн. Кусджытæ нын куыд радзырдтой, афтæмæй сæм абон бирæ адæм ис, фæлæ сæм къуылымпындзинæдтæ нæй. Куыстуаты, æви дæхи хæдзары скæнай бæрæгбон... Уый алкæмæндæр йæхи бар у, зæгъынц нæ горæты цæрджытæ. Сæйрагдæр сын у уый, æмæ адæм цæттæ сты зæрдиагæй сæхи Хуыцауыл бафæдзæхсынмæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv