Ирон æвзаджы рæзтæн

ЮНЕСКО-йы кафедрæйы æххуысæй цалдæр азы размæ нæ республикæйы скъоладзаутæн мыхуыры рауагътой ирон æвзаджы ног чингуытæ. Конд сты, ирон æвзаг чи зоны, канд уыдонæн нæ, фæлæ ма йыл чи нæ дзуры, уыдонæн дæр. Ног чингуыты руаджы фæуæрæхдæр хъуамæ уой ахуырады гæнæнтæ. Фæлæ чинуытæм иуæй-иу ахуыргæнджытæ æмæ ныййарджытæ райдыдтой фиппаинæгтæ хæссын. Нæкуысаты Иринæ йæ урокты архайы сабиты мадæлон æвзагмæ разæнгард кæныныл. Æмæ йын уыцы хъуыддаг, æнæмæнг, æнтысы. Куыд зæгъы, афтæмæй чингуытæ уымæн стыр æххуыс сты. Уымæн æмæ арæзт сты нырыккон домæнтæм гæсгæ. Иринæ куыд зæгъы, афтæмæй ног чингуыты фæзындимæ ахуыргæнджыты гæнæнтæ дæр фæуæрæхдæр сты. Фæлæ мыхуыргонд æрмæджытæм фиппаинæгтæ дæр разынд. Скъоладзаутæ ног чингуытæм гæсгæ ахуыргæнгæйæ хатгай зындзинæдтæ æййафынц. Кæмдæр тексттæ егъау сты, кæм та – ног дзырдтæ зын æмбарæн. Кæд сын скъолайы ахуыргæнæджы бон баххуыс кæнын у, уæд хæдзармæ куыст кæныны рæстæг ахуырдзаутæ сæ хъуырмæ свæййынц. Ирон æвзаджы чингутытыл ногæй бакусынæн нæ республикæйы ахуырад æмæ наукæйы министрады хъæппæрисæй арæзт æрцыд экспертон къамис. Йæ уæнгтæ сты нæ республикæйы ирон æвзаджы хуыздæр ахуыргæнджытæ, стæй ма ахуыргæнджыты дæсныйад уæлдæргæнæн институты ирон кафедрæйы кусджытæ. Уыдон чингуыты æрмæджытæм лæмбынæгæй æркастысты. Алы текст æмæ фæлтæрæнимæ дæр бакуыстой. Сæ авторты разыдзинадæй хъæугæ ивддзинæдтæ бахастой æрмæджытæм. Уæвгæ, ЮНЕСКО-йы кафедрæйы куыд фехъусын кодтой, афтæмæй фиппаинæгтæ методикон æгъдауæй се 'ппæт бынтон раст не сты. Чингуыты сæ куы нæ спайда кæной, уæд бирæ æцæг ирон дзырдтæн сæ адзал æрцæудзæн. ЦИППИ-йы поликультурон æмæ полилингвалон ахуырады ЮНЕСКО-йы кафедрæйы сæргълæууæг Хъамболты Тамерлан: «Нæ адæм ныр, хъыгагæн, ирон-уырыссаг æвзагыл дзурынц. Æцæг ирон, бындурон дзырдтæ бирæтæ нæ зонынц. Æмæ уыцы дзырдтæ мах хъуамæ райгас кæнæм. Хъуамæ сæ ног фæлтæртæм радтæм. Цæмæй æцæг, сыгъдæг ирон æвзагыл дзурой. Чи зоны æмæ ныййарджыты дæр бахъæудзæн уыцы ног дзырдтæ æмæ ног хабæрттæ базонын, сæ афоныл сæ кæй нæ базыдтой, уымæ гæсгæ». Ныртæккæ къамисы куыст кæронмæ фæхæццæ кæны. Автортæ æмбæлгæ ивддзинæдтæ куы бахæссой, уæд чингуытæн сараздзысты æхсæнадон экспертизæ. Ома, сæ министрады сайты равæрдзысты æмæ сæм алкæй бон дæр уыдзæн æркæсын æмæ йæ хъуыдытæ зæгъын. Сентябрмæ хъуамæ чингуытæ æмбæлгæ ивддзинæдтимæ мыхуыры рацæуой. Стæй сæ уый фæстæ та скъолатæм арвитдзысты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv