Фæсивæды галуаны ацыд концерт «Мир, танец, дружба!»

Сабырдзинад, кафт, хæлардзинад. Дзæуджыхъæуы Фæсивæды галуаны сценæйыл ацыд æрыгон курдиæтты концерт. Архайдтой дзы сфæлдыстадон къордтæ Цæгат æмæ Хуссар Ирæй, стæй Луганскæй. Мадзал сарæзта Фæсивæды хъуыддæгты фæдыл комитет. Куыд зæгъынц, афтæмæй ахæм фембæлдтытæ фидар кæнынц хæлардзинад æмæ ахъаз сты национ сфæлдыстады рæзтæн. Ирд дарæс, аив кæфтытæ æмæ хъæздыг репертуар. Алы фезмæлды дæр уæздандзинад æмæ удтавæн рухс. Луганскы адæмон кафты ансамбль «Родослав»-ы артисттæ сæхи ацы фестивальмæ бирæ рæстæг цæттæ кодтой. Фæндыд сæ бæрзонд æмвæзадыл кафт равдисын æмæ сын бантыст. Хуссарирыстойнаг фæсивæд та фестивальмæ бацæттæ кодтой 5 кафты. Национ симд æмæ хонгæйæ уæлдай, Цхинвалы хореографион ансамблы «Ирон»-ы репертуары ис «Испайнаг кафт». Коллектив рæсугъд кафт равдисынмæ æппынæдзух цæттæ вæййы. Æрыгон артисттæ та сты ныфсджын, фæлæ хæдæфсарм. Концерт сарæзтой Уæрæсейы фæсивæдон политикæйы райрæзты комплексон программæ «Регион для молодых»-ы фæлгæты. Йæ сæйраг нысан - национ сфæлдыстады райрæзт æмæ адæмты 'хсæн æнгом бастдзинад. Мадзаларазæг - Фæсивæды хъуыддæгты фæдыл комитет. Коллективтæ концерт равдыстой Хуссар Ирыстоны дæр. Цхинвалы Хетæгкаты Къостайы номыл паддзахадон драмон театры аивадуарзджытæй къух бакæнæн дæр нæ уыд. Æфсымæрон адæмты 'хсæн хæлар ахастдзинадтæ фидар кæныныл та куыст цæудзæн дарддæр.