Аразынц бирæ

Уæрæсейы хицауады уынаффæмæ гæсгæ регионты культурæйы æмæ спортивон объекттæм базилынæн снысан кодтой сæрмагонд программæ. Æххæстгонд цæуы Цæгат Ирыстоны дæр. Йæ фæлгæты сарæзтой ног, кæнæ бындуронæй базылдысты республикæйы районты культурæйы хæдзæрттæм, спортивон скъолатæм æмæ комплекстæм. Сæйраг домæн у куыстыты хæрзхъæддзинад. Абон æй сбæрæг кодта Тускъаты Таймураз, республикæйы районтæм кусæг балцы ацæугæйæ. Михайловскæйы культурæйы хæдзар никуы уыд. Искуы сæм фæзындзæн, уый æнхъæл дæр нал уыдысты. Фæлæ ацы аз хъæумæ арæзтадон æрмæджытæ куы баластой, уæд сæ цинæн кæрон нал уыд. Ныр бонтæ нымайынц ног культурæйы галуан кæд байгом уыдзæн, уымæ. Проектмæ гæсгæ дзы уыдзæн стыр кинозал æмæ алыхуызон сфæлдыстадон къордтæн агъуыстытæ. Аразджыты ныхæстæм гæсгæ ног клубы фыццаг уазджытæн «Æгасцуай» зæгъдзысты 18 декабры. Республикæйы хицауады сæрдар Тускъаты Таймураз кусджытæн бафæдзæхста, цæмæй кусой фæткмæ гæсгæ æмæ объект афоныл сцæттæ кæной. Иу ног культурæйы артдзæст ма сарæзтой Ног Бæтæхъойыхъæуы. Ацы цаумæ цæрджытæ æнхъæлмæ кастысты 20 азы бæрц. Ныртæккæ куыстытæ кæронмæ фæхæццæ кæнынц, хъуамæ фæуой сæрды райдиан. А-дыууæ боны бæстыхаймæ баласдзысты 300 бадæн бынаты. Къостайыхъæуы та культурæйы хæдзар байгом кæндзысты 23 декабры. Зæронд бæстыхайыл цыд 36 азы, кæлæддзаг уавæры кæй уыд, уымæ гæсгæ йæ 10 азы размæ сæхгæдтой. Ног культурæйы хæдзар та сарæзтой скъолайы фарсмæ. Ныр сывæллæтты алыхуызон секцитæм æмæ къордтæм дард цæуын дæр нæ хъæудзæн. Ай та у Николаевскæйы станицæйы культурæйы хæдзар. Бæстыхай арæзт уыд ивгъуыд æнусы 70-æм азты.Уæдæй абонмæ бындуронæй цалцæггонд никуы уыд. Ныр æм базылдысты. Аразджыты ныхæстæм гæсгæ, бæстыхайы хъармгæнæн системæ нæй. Æмæ йыл хæстæгдæр рæстæг куы нæ бакусой, уæд уый фæстæ сæ цалцæггæнæн куыстытæ фæдзæгъæл уыдзысты.Тускъаты Таймураз сын уый тыххæй бауайдзæф кодта. Дыгуры фæсивæд та тагъд рæстæджы райдайдзысты ног спортивон-дзæбæхгæнæн комплексмæ цæуын. Уыдзæн дзы 5 залы æмæ ног футболон фæз. Уыцы-иу рæстæг дзы спортæй архайыны фадат уыдзæн 100-ай адæймагæн. Тускъаты Таймуразы зæрдæмæ фæцыд, аразджытæ хорз æмæ æмгъуыдмæ гæсгæ кæй кусынц, уый. Тускъаты Таймураз ма бабæрæг кодта Мæздæджы район. Абон дзы кадджын уавæры байгом кодтой сывæллæтты ног хæдзар. Кæстæртæн раарфæ кæнынмæ сæм æрбацыд хицауады сæрдар. Сывæллæттæ бацæттæ кодтой концерт, хъомылгæнинæгтæй та иу премьерæн сарæзта экскурси. Цингæнгæйæ йын равдыста сæ уаттæ, спортзал, хуыйæн цех - ам сывæллæтты ахуыр кæндзысты æрмдæсныйадыл. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv