Сывæллæтты сфæлдыстады галуаны æнтстджынæй кусы æрыгон нывгæнджыты студи

Сывæллæтты сфæлдыстады галуаны цы æрыгон нывгæнджыты цæттæ кæнынц, уыдон республикон æмæ æппæтуæрæсеон конкурсты свæййынц уæлахиздзаутæ. «Радуга детства»-йы къорды ис 20 сывæллоны, 4 азæй-15 азы онг кæуыл цæуы, ахæм хъомылгæнинæгтæ. Сæ ахуыргæнæг Гуцъунаты Ольгæ æппынæдзух архайы, цæмæй сывæллæттæ зæрдæргъæвдæй ахуыр кæной ныв кæныныл. Æмæ сын æнтысгæ дæр кæны. Камилла Магомедова æрыгон нывгæнæг у. Республикон сывæллæтты сфæлдыстадон галуаны ныв кæныныл ахуыр кæнынмæ йæ æрбакодта йæ мад Зæринæ. Гыццылæй ныв кæнын бирæ кæй уарзта, уый тыххæй æрбацыдысты ацы къордмæ. Архайы цымыдисæй æмæ зæрдæргъæвдæй. ⠀ Гуыззыттаты Мария ныв кæнынмæ фæцалх чыылæй мультфильмтæм кæсгæйæ. Цы алыхуызон персонажтæ дзы уыдта, уыдон-иу ныв кæнын райдыта, æмæ-иу сæ цалынмæ кæронмæ нæ фæци, уæдмæ-иу йæ ныв нæ ныууагъта. Ныридæгæн республикон æмæ æппæтуæрæсеон конкурсты вæййы уæлахиздзау. ⠀ Æрыгон нывгæнджыты алыхуызон нывтæ кæныныл ахуыр кæны Сывæллæтты сфæлдыстадон галуаны нывкæнынады хайад «Радуга детства»-йы педагог Гуцъунаты Ольгæ. Кæддæриддæр архайы, цæмæй йæ хъомылгæнинæгтæ цымыдисæй архайой, цæмæй сæ куыстытæ æвдыст цæуой алыхуызон конкурсты, равдыстыты æмæ форумты. ⠀ Гуцъунаты Ольгæ, Сывæллæтты сфæлдыстадон галуаны нывкæнынады хайад «Радуга детства»-йы педагог: «Сывæллæттæ цымыдисæй цæуынц уроктæм, ныв кæнын тынг уарзынц, фæлæ уымæй тынгдæр та сæ зæрдæмæ цæуы, уæлахиздзаутæ кæй свæййынц æмæ кады нысантæ кæй райсынц, уый. Цы темæтыл фыссынц, уыдон бирæвæрсыг сты: сывæллæттæ ныв кæнынц пейзажтæ, натюрморттæ æмæ портреттæ. Уымæй уæлдай ма сырдты нывтæ кæнын дæр уарзынц». ⠀ Нывкæнынады аудитори æрыгон нывгæнджытæй кæддæриддæр вæййы дзаг. Ардæм сывæллæттæ цæуынц зæрдæргъæвдæй, ахуыр кæнынц алыхуызон хуызджын нывтæ кæныныл. 4 азы дæргъы сын дæсныйад амонынц зындгонд ахуыргæнджытæ. Къуыри дыууæ хатты сывæллæттæ фæзонгæ кæнынц курдиатджын нывгæнджыты сфæлдыстадимæ. Скæнынц хуызджын æмæ аив нывтæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv