Футболон клуб «Алани» йæхи цæттæ кæны радон спортивон фембæлдмæ

Футболон клуб «Алани» -йы разамонджытæ ног сæйраг тренеры снысан кодтой. Ивгъуыд къуыри йæ командæимæ базонгæ кодтой. Олег Василенко клубимæ куысты фæдыл бадзырд бафыста азы кæронмæ. Тренеры сæйраг нысан у премьер-лигæмæ рахизын.  Футболон фæзыл æрæмбырд «Алани»-йы къорд æххæстæй. Тренировкæйы размæ сын зондамонæн æмæ разæнгардгæнæг ныхæстæ кæны сæ ног сæйраг тренер - Олег Василенко. Кæд коллективимæ нырма æрæджы базонгæ ис, уæддæр семæ иу æвзагыл дзуры. Йæ архайдмæ гæсгæ ныридæгæн зæгъæн ис, æмæ уæлдай цæстæнгас стратеги æмæ тактикæмæ кæй здахы, уый. Стæй физикон фæлтæрæнтæ дæр рох нæ кæны. Тренеры æнтыстдзинæдтæ - куыд хи, афтæ командæйы дæр - чысыл не сты. Футболуарзджытæ йæ зонынц «Авангард», «Сочи» æмæ «Урал»-имæ куыд куыста, уымæй. Уæдæ фæлтæрдджын дæр куыд нæ у. Зæгъæм, куыста æмæ ахуыр кодта ахæм зындгонд тренеримæ, куыд Гус Хиддинк. Ахæм зæрдахаст рахызт командæйы уæнгтæм дæр. Олег Василенко тренировкæтæ аразы бирæвæрсыг æмæ парахатæй. Хъазты иу æууæл дæр дзы фæстейы нæ аззайы. Лæмбынæг кæсы фæзыл футболисттæ куыд æвæрд сты, командон хъазты æмархайд куыд кæнынц, ныхмæллæууæджы дуæрттæм куыд арæх æмæ рæстдзæвин цæф кæнынц пурти. Тренеры тактикæ футболистты зæрдæмæ дæр цæуы. Ныртæккæ «Алани» йæхи цæттæ кæны футболон клуб «КАМАЗ»-имæ хъазтмæ. Спортивон фембæлд арæзт æрцæудзæн Набережные Челныйы 2-æм апрелы. Фæстаг хатт нæ командæ рамбылдта ивгъуыд аз ноябры. Футболисттæ æмæ тренерты штаб сæхи цæттæ кæнынц æрмæст дæр уæлахизмæ. Гæтæгты Сабинæ