Ног ахуыры азмæ рæвдз кæнынц Хуссар Ирыстоны

Ног ахуыры азмæ рæвдз кæнынц Хуссар Ирыстоны дæр. Цхинвалы районы, Хетагкаты  хъæуы скъолайы ныртæккæ цæуынц цæттæгæнæн мадзæлттæ. Районы цæрæнуæтты-коммуналон хæдзарады æххуысæй дзы пъланмæ гæсгæ цæуынц цалцæджы куыстытæ. Ныртæккæ кусджытæ ахорынц къултæ. Скъолайы директор Тыбылты Олег куыд зæгъы, афтæмæй уæлдай цалцæггæнинаг у спортивон зал. Йæ пъолы цъар æрцыд æвзæр æрмæгæй арæзт. Уыимæ ма æнæниздзинадæн зиан чи хæссы, ахæм токсинтæ дæр уæлдæфмæ уадзы. Хъæуы йæ иууылдæр баивын. Фæлæ уымæн æхцайы фæрæзтæ нæма ис. Цхинвалы районы администрацийы ахуырады хайады куыд æмбарын кæнынц, афтæмæй архайынц фарста аиуварс кæныныл. Ацы аз скъолайы бон у 13 скъоладзауы фыццæгæм къласмæ райсын. Скъолайы ма кусы сывæллæтты рæвдауæндон дæр. Ам фарон сног кодтой сантехникæ. Ныр та ма дзы хъæуы хæрæндонмæ базилын. Ахæм цалцæджы куыстытæ арæзт цæуынц Цхинвалы районы иннæ скъолаты дæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv