«Учитель года» æркасты уæлахиздзау - Цорæты Зитæ

Цæгат Ирыстоны æнтыстджынæй ацыд конурс «Учитель года». Ацы аз йæ архайджыты дæсныйадæн аргъ кодтой бæрнон жюрийы уæнгтæ, Уæрæсейы алы регионтæй. Æркасты уæлахиздзау сбæрæг - Цорæты Зитæ, Беслæны астæуккаг скъолайы, англисаг æвзаджы ахуыргæнæг. Саккаг ын кодтой фатер æмæ сертификатæй 500 мин сомæн. Цы йæ разæнгард кæны ахуыргæнæджы дæсныйады? Уый тыххæй бæлвырддæр нæ дарддæры æрмæджы. Англисаг æвзаджы урокты рæстæг скъоладзаутæ цымыдисæй хъусынц ахуыргæнæгмæ. Цорæты Зитæ се ппæты дæр æнцонæй сразæнгард кæны йæ предмет ахуыр кæнынмæ. Ног дзырдтæ æмæ темæтыл ныхас кæнгæйæ, суанг ма урокты фæстæ дæр баззайынц,. Дзебойты Аланæ, ахуырдзау: «Англисаг æвзаджы уроктæ мæ зæрдæмæ тынг цæуынц. Фыццаджыдæр, нæ ахуыргæнæг Зитæ Энверовнайы руаджы. Йæ алы урок дæр вæййы цымыдисаг. Бирæ ног хъуыддæгтæ базонæм. Диссаджы ахуыргæнæг у. Алы æрмæг дæр нын æнцонæй бамбарын кæны. Ныр дæр æй фидарæй зонын, мæ цард англисаг æвзагимæ кæй сбæтдзынæн, уый. Алы хъуыддаджы дæр нын Зитæ Энверовнæ æххуыс кæны. Æмæ дзы бузныг стæм». Цорæты Зитæ уыцы иу рæстæг ахуыр кодта: юридикон æмæ фæсарæйнаг æвзæгты факультетты. Фæлæ, уæддæр равзæрста скъола. Кусын куы райыдыдта, уæд æй бамбæрста, æнæ ахуырдзаутæй йæ бон кæй нал суыдзæн, уый. Ныр скъолайы Зитæ кусы 17 азы. Уыдонæй 13 азæй фылдæр Беслæны 8-æм скъолайы. Цорæты Зитæ, ахуыргæнæг: «Фæсарæйнаг æвзæгтæ базонын мæ фæндыди æмæ бацыдтæн уыцы факультетмæ. Скъолайы кусын райдыдтон, фæсарæйнаг æвзæгты факультет юридиконæй раздæр кæй фæдæн, уый тыххæй. Афтæ кæй рауад, æмæ абоны онг скъолайы кæй кусын, уымæй тынг разы дæн». Зитæйы афтæ куы бафæрсай, ахуыргæнæджы æнтыстдзинад цæмæй аразгæ у, зæгъгæ, уæд йæ дзуаппыл иу уысм дæр нæ ахъуыды кæндзæн. Цорæты Зитæ, ахуыргæнæг: «Мæнмæ гæсгæ, ахуыргæнæджы æнтытсдзинад аразгæ у цалдæр хъуыддагæй. Ахуыргæнæг хъуамæ сывæллæтты сцымыдис кæна, стæй уроччыты фæтк раст араза. Ахуыргæнæг цыфæнды дæсны куы уа, уæддæр сæйрагдæр у сывæллæтты зæрдæтæм фæндаг ссарын æмæ сын хи бауарзын кæнын. Уæд дын дæ предмет дæр бауарздзысты». Фыццаг хатт Зитæ конкурсы йæ тыхтæ бафæлвæрдта 2010 азы. Фæлæ, уæд фыццаг къæпхæнæй дарддæр ацæуын йын нæ бантыст. Ацы хатт йæ къухы бафтыд фылдæр æнтыст. Жюрийы уæнгтæ йын йæ арæхстдзинадæн скодтой стыр аргъ. Бацæттæ кодта урок хъуамæ раст куыд цæуа, уыимæ баст проект, сарæзта дæсныйад æвдисæн ахуыртæ. Цорæты Зитæ, ахуыргæнæг: «Конкурсы архайын - бæрнон хъуыддаг уыд. Æнхъæл дæр æй нæ уыдтæн, ахæм æнтыстдзинæдтæ мæ къухы кæй бафтдзæн, уый. Мæ тыхтæ бавзарын мæ фæндыд. Мæ бынаты уын финалмæ чидæр рацыд, уыдонæй алкæй бон дæр уыд. Се 'ппæт дæр тынг арæхстджын уыдысты. Конкурс дæр иннæ азтимæ абаргæйæ зынгæ хуыздæр арæзт уыд. 2010 азы æрмæджытæ дæр афтæ бирæ нæ уыд. Ацы аз нын конкурсы агъоммæ ахуыртæ дæр сарæзтой». Конурс «Учитель года» республикæйы цæуы æрвылаз. Йæ архайджыты дæсныйадæн аргъ кодтой бæрнон жюрийы уæнгтæ, Уæрæсейы алы регионтæй. Се 'хсæн педагогон наукæты кандидаттæ, конкурсы иннæ азты уæлахиздзаутæ, эксперттæ. Конкурсмæ бацæттæ кæнынмæ Зитæйæн æххуыс кодтой йе 'ппæт æмкусджытæ дæр. Уый хынцгæйæ йæ уæлахиз дæр нымайы иумæйагыл. Конкурсы регионалон къæпхæны уæлахиздзауæн балæвар кодтой фатер æмæ 500 мин сомы. Æртæуатон цæрæнуаты хæрзиуæгыл ахуыргæнæг йæ бæллицты дæр никуы мысыд. Фæлæ, куыд зæгъы, афтæмæй сæйрагдæр у конкурсы рæстæг цы фæлтæрддзинад райста, уый у. Цорæты Зитæ, ахуыргæнæг: «Кваритрæ у цыппæрæм уæладзыджы. Иу хатт дзы уыдтæн, федтой æй. Райдзаст фатер у. Уый æнхъæл нæ уыдтæн æмæ мæ афтæ схорзæхджын кæндзысты. Тынг æхсызгон мын у». Ныр ма Зитæ йæхи цæттæ кæндзæн конкурсы æппæтуæрæсеон къæпхæнмæ. Уыдзæн сентябры Волгограды. Ног æнтыстдзинæдтæ йæ къухы кæй бафтдзæн, уый дызæрдыккаг нæу. Хуасдзауты Алинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv