Стамбул æмæ Анкарайы цæрæг ирон адæм кæрæдзиимæ фембæлдысты

Ныртæккæ кæй равдисдзыстæм, уыцы кадртæ не `мтуг адæмимæ баст сты. Ирон адæмы `хсæнады сæргълæууæг Хъуысаты Садреттин нын куыд фехъусын кодта, афтæмæй ныр 20 азы бæрц Стамбул æмæ Анкарайы цæрæг ирæттæ нысангонд æмгъуыды сæмбæлынц. Кæрæдзийы фенынæн равзарынц æндæр горæт - Болу, зæгъгæ. Афтæ бакодтой ныр дæр. 2 боны сæ кæрæдзиуыл цин кæнынæй а-дунемæ нал `вдæлд. Æдæппæтæй уыдысты 200-мæ `ввахс. Ахæм хъæрмуд фембæлдтыты рæстæг сæ фыдыуæзæг тынгдæр æрлæууы сæ зæрдыл. Уымæн æмæ дзы вæййынц ирон ныхас, ирон зарæг æмæ ирон фарн. Афтæ зæрдиаг рауайы сæ кæрæдзийы фенд, æмæ ма дзы суанг нæлгоймæгтæн хъæбынтæ кæныны ерыстæ дæр саразынц. Чи фæуæлахиз вæййы, уыдонæн та - чысыл зæрдæлхæнæн лæвæрттæ. Уый фæстæ, сæ хъæлдзæгдзинад цыппар къулы `хсæн куы нал фæцæуы, уæд сын аивылы кæртмæ. Суанг изæрмæ фæхъуысынц сæ фæндырдзагъд æмæ зарæджы зæлтæ. Фæсивæд нал фефсæдынц кафынæй. Хистæрты хъуыдымæ гæсгæ, фыдæлтыккон æгъдæуттæ бахъахъхъæнынæн ахæм мадзæлттæ ахъаз сты. Фæлтæрæй-фæлтæрмæ дæттынц, сæхæдæг сæ фыдæлтæй кæй фехъуыстой, уыцы ирон царды миниуджытæ. Æцæгæлон адæмы `хсæн цæргæйæ сын ног фæлтæрты кæд зын у фыдæлты `гъдауыл æфтауын, уæддæр ыл архайынц. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv