Цæгат Ирыстонмæ кусæг балцы ссыдысты хæрзаудæн фонд «Воскресение»-йы минæвæрттæ

Цæгат Ирыстонмæ кусæг балцы ссыдысты хæрзаудæн фонд «Воскресение»-йы минæвæрттæ. Делегацийы сæргъы Александр Каньшин. Сæ балцы сæйраг нысан - Уæрæсейы гæрзифтонг тыхты сæйраг аргъуаны арæзтад. Дзæуджыхъæуы Афицерты хæдзары уазджытæ фембæлыдысты 58-æм армийы æфсæддонтимæ. Александр Каньшин сын радзырдта арæзтадон куыстытæ куыд цæуынц, уый тыххæй. Гæрзифтонг тыхты аргъуанæн бындур савæрдтой 2018-æм азы, сентябры. Куыстытæ кæронмæ фæуыдзысты 9-æм маймæ. Аргъуан уыдзæн егъау. Уæрæсейы аргъуанты 'хсæн ахæм уыдзæн æртыккаг. Аразынц æй Уæрæсейы хъахъхъæнады министрады фæз «Патриот»-ы, Мæскуыйы облæсты. Аргъуанимæ ма аразынц историкон-мемориалон комплекс «Дорога памяти», зæгъгæ, дæр. Йæ дæргъ уыдзæн 1418 метры. Уал боны цыд Фыдыбæстæйы Стыр хæст. Пресс-конференцийы рæстæг Александр Каньшин радзырдта аргъуан аразыны лыстæгдзинæдты тыххæй. Бæлвырддæр дзургæйæ та, рагон технологитæм гæсгæ кæй аразт цæуы, уый. Стæй ма, фæбæрæг кодта, музейы комплексæн æрмæджытæ кæй æмбырд кæнынц. Александр Каньшин равдыста аргъуаны сæйраг дзæнгæрæджы хуызæг. Абон æй балæвар кæндзысты Беслæны фыццæгæм скъолайæн. Ветеранты Совет æмæ «ДОСААФ»-ы регионалон хайады минæвæрттæн саккаг кодтой арфæйы фыстæджытæ Уæрæсейы хъахъхъæнынады министр Сергей Шойгуйы номæй. Александр Каньшин, хæрзаудæн фонд «Воскресение»-йы генералон директор: «Ис нæм хъуыды, аргъуаны алыварс музейон комплекс саразын. Фыдыбæстæйы Стыр хæсты 33 милуан архайæджы нæмттæ, ахæм хуызы æрхъуыды кæнын. Абон æфсæддон-патриотон центрты, военкоматты ветеранты советимæ æмбырд кæнынц информаци. Республикæйы цæрджытæм дæр сидæм, цæмæй уыцы хъуыддаджы бацархайой». Александр Каньшин, хæрзаудæн фонд «Воскресение»-йы генералон директор: «Ныридæгæн уал бæстыхайы сæр срæвдз. Ныртæккæ дзы цæуынц мидæггаг куыстытæ. Аргъуаны бынат уыдзæн 6 мин адæймагæн. Йæ цуры уыдзæн фæз дæр. Дæллаг аргъуан нын цыбыр рæстæгмæ уыдзæн цæттæ». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv